"Кугарнягудо" рубрик, 2016 ий, Пургыж тылзын 19-ше кечыже

Мураш кумылан туныктышо

Статьян авторжо Ирина Степанова

мусагитовПошкырт вел гыч мураш йӧратыше рвезе Роман Мусагитов Марий Элыште чӱчкыдын огеш выступатле. Тудо лач Йошкар-Олаште эртыше регион-влак кӱкшытан “Ший памаш” конкурсыш ушна. Тений нылымше гана толын ыле да кумшо вер дене палемдалтын. Але марте Роман Мусагитовым калык утларакшым Марий Эл радио дене йоҥгышо «Кушто тый улат?» мурыж гоч пала. Тыгеже шыма йӱкан ты пӧръеҥ мурызо огыл, муро – тудын шкешотан хоббиже.
Роман Пошкырт кундем Илиш район Анач ялыште шочын-кушкын. Тышечак улеш мурызо Татьяна Умурбаева. Кечыште йылгыжалт йогышо Ош Вичын моторлыкшо, сылне пӱртӱс, очыни, Романым изинекак усталык аланыш шупшылыныт: тудо йочаж годымак мураш-кушташ йӧратен, адакшым ава-ачажат ялысе ансамбльыш коштыныт. Школышто тунеммыж годым Роман музык урокым йӧратен шынден. А ты предметым лач Татьяна Витальевна Умурбаева вӱден. Тудым ончен, рвезе мураш эшеат чот кумылаҥын.
Школ деч вара — Благовещенскысе педколледж. Рвезе тунамат мурымо сомылжым кудалтен огыл. Икымше мурыжо лач тунамак шочын. А тачылан 10 наре марий мурыжо уло. Ондак тудо эрвелмарий самодеятельный композитор Валерий Садретдиновын мурыжо-влакым мурен гын, кызыт шкежак возаш тырша. Тыгак семым татар композитор Ленар Бикмурзин сераш полша. Кеҥежым йолташыже-влак Олег Славин да Надин дене пырля гастрольыш лектеш. Уралыште, Татарстанысе да Удмуртийысе марий-влакым куандареныт.
Таче Роман Тимиршинович Благовещенскыште ила да тысе педколледжыште технологий ден ОБЖ предметлам туныкта, тысе «Келшымаш» марий ансамбльым вуйлата.
Пелашыж дене коктын кандаш ияш Егор ден кок ияш Софьям ончен куштат.
Ирина Степанова.
Авторын фотожо.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: