"Рубрик деч посна", 2016 ий, Пургыж тылзын 26-шо кечыже

Мыйын пӧртем – мыйын орем?

Статьян авторжо Эльвира Терентьева

Ольга Ребко темла

Коляскыште шинчыше инвалид Ольга Ребко нерген ӱмаште декабрьыште кӱчыкын возенна ыле. Самырык ӱдыр илышлан ӧпкелыде илен мошта, шкаланже пашам (кусарыше, журналист да кидмастар) муын да начар тазалыкан еҥ-влаклан ой-каҥашым пуэн шога. Ме тудын темлымашыж дене палдараш тӱҥалына. Ребко1

- Кызыт тӱрлӧ административный зданийыш, каныме, эмлыме да моло вес учрежденийыш начар тазалыкан еҥ-влакын пурен кертмышт нерген каласкалымаш модышко савырнен. Инвалид-влаклан олалаште тӱрлыжым келыштарат, да ты паша эркын ышталтеш гынат, ончаш тидым чынак куанле.

Но коштын кертдыме еҥлан эн кӱлешанже почто пӧлкашке пурен кертме але тротуарыште волен-кӱзен кайыме огыл. Мыланна эн ончык шкенан илыме пӧртыш пураш да лекташ йӧным ыштыман! Кунам тидыже уке гын, чынжымак, ме шкаланна ораваште шинчыше рыцарьла чучына. Кажне гана тунар шуко вийым пытарыман. Тыгодым кӧргӧ чоннамат чот пудыратылына.

Илыме пачерыштына кажне кечын подвигым ыштыме олмеш моткочак канынена. Балконыш лекме, шкалан кофем шолтымо але шкеак мушкылтмо шуэш. Мутат уке, мемнам йӧратыше да мемнан верч азапланыше родо-тукымна пеленнак улыт, йодат гын, вигак полшаш толыт. Но, мыйын шонымаште, кугыеҥ элементарный манме илыш проблемыж гыч шке семын лекташ тунемшаш. Тек весе-влакын семын ыштен огеш керт, ойыртемалтшын ышта, но шке вий дене! Мутат уке, пырля илыше-влак тореш лийыт. Но шукыж годым мемнан ӱмбаке тыгай мут “чоҥешта”: “Тый садак нимом ыштен от керт!” Теве тунам ом пале, мом ышташ: шорташ ала воштылаш? Конешне, южгунам айдеме ты але вес сомылым ыштен ок керт. Но чыла пашам куштылемдаш йӧн уло, тугеже опекунланат каньылырак лиеш. Мутлан, коляскыште шинчыше еҥ ораважым шкежак пӱтыра гын, кӱшнӧ каласыме фразе келшен ок тол.

Мый шуко жап шонышым: пачерыште вер гыч верыш кудалыштме шотышто ойлаш але уке? Вара ик палымемым шарналтышым. Тудо шкетын кодмо годым эмым йӱаш да аярген колаш шонен пыштен. Ача-аваже шочшыштлан пачерыште нимогай условийым огыт ыште. Вет нуно кызытеш пеленак улытыс. А ситуаций кеч-могай татыште вашталтын кертеш. Молан шке икшывылан тушман лийман манын, шуко жап ӧрын коштынам. А варажым пален нальым: тиде ик случай гына огылыс. Икмыняр еҥым ты шотышто йодыштым. Иктылан пырля илыше еҥ-влак пӧрт мучко шагалрак кудалышташ ойленыт, вет коляске кугу, туддене эре ала-мом пудырташ, руалташ, обойым кушкедаш да мебельым удыраш лиеш. Вес инвалидлан кок пачашан пӧртысӧ кокымшо пачашысе пӧлемым пуэныт, могай амал дене, ала. Ала-кӧжӧ моткоч шуко эҥгекым конда манын, шке икшывыжлан микроволновый коҥгам ок нал. А мемнан гай еҥлан газым чӱкташ неле улмым, шкалан кочкышым кузе ырыктымым ала-молан шотыш огыт нал. Тиде оҥай да чоным коржтарыше спискым шуяш лиеш. Теве тудо – сеҥен налаш лийдыме ор (крепость) – ала-могай зданий огыл, а еҥ-влакын шонен моштымашышт. Южгунамже пелен улшо лишыл еҥ-влаклан тидым умылтарен мошташ мыланна орым налме деч нелырак.

Шонанпылын ик тӱсшӧ” вес лаштыкыште кузе тидым ышташ кӱлмӧ дене палдарена.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: