"Илыш йогын" рубрик, 2016 ий, Пургыж тылзын 16-шо кечыже

Погынлан ямдылалтына

Статьян авторжо Анастасия Эманова

14-16 апрельыште Йошкар-Олаште марий калыкын X погынжо лиеш. Ты мероприятийлан ямдылалтме кузе паша кайыме шотышто 10 февральыште мер-политике рӱдерыште пресс-конференций эртен.

Журналист-влакын йодышыштлан Мер Каҥашым вуйлатыше А.Н.Иванов, тудын икымше алмаштышыже В.А.Мочаев, РМЭ тӱвыра, печать да национальность паша шотышто министрын алмаштышыже, оргкомитетын членже Г.С.Ширяева вашештеныт.

Ныл ийлан ик гана республик гыч веле огыл, тӱрлӧ регион гыч марий калыкна погына. Ты мероприятийыште калыкым тургыжландарыше пӱсӧ йодыш-влакым нӧлталын, ончыкыжо мом ыштышашым палемдаш шонена.

Погын годым “Еш да марий йылме”, “Марий йӱла”, “Самырык тукым да тачысе саман” секций-влак пашам ыштат. Тылеч посна “Россий кугыжанышыште марий калыкын верже”, “Марий мер толкынын ончыкылыкшо” теме-влак дене “йыргешке ӱстел-влак” лийыт.

Погын вашеш кажне кечын манме гаяк 1 март марте Марий Элын районлаштыже да шочмо калыкнан илыме регионлаштыже погынымаш але конференций сынан мероприятий-влак эртаралтыт. Кажне тыгай мероприятийыште еҥ-влак тӱрлӧ темлымашым ойлен, йодыш-влакым нӧлталын кертыт. Мутлан, Звенигово районышто вашлийме годым марий-влак Какшамарийыште Андрей Эшпайлан бюстым шогалташ кӱлмӧ нерген ойленыт.

Таче кечылан погынымаш-влак республикысе кандаш районышто лийыныт. Тылеч посна Удмуртий, Татарстан, Киров, Пошкырт, Ленинград ден Моско кундемлаште эртеныт”, - ойлен А.Иванов.

Погыныш 400 утла марий еҥ толшаш. Нунын коклаште – 274 делегат, молышт – эскерыше ден уна-влак.

Республикыштына марий йылмым утларакшым кугыжаныш семын веле туныктат. Тиде проблеме. Сай пример шотеш Пошкырт кундемым кондаш лиеш. Тушто марий-влак шочмо йылмышт дене мутланат, тылеч посна шукынжо татарлат ойлен моштат. Садлан йылме йодыш погынышто ик эн тӱҥ лиеш”, - манеш В.Мочаев.

Оргкомитет Погынлан кыртмен ямдылалтеш. “Погыным эртараш кугыжаныш оксам ойырен. Тудым транспортлан, кочкышлан кучылтына. Тыгак делегат-влаклан тоштерлаште экскурсийым эртарена. Кум кечылан культур программым ямдыленна. Погынын участникше-влаклан М.Шкетан лӱмеш Марий театрыште, йоча да самырык-влаклан театр-рӱдерыште спектакль-влак ончыкталтыт. А Э.Сапаев лӱмеш опер да балет театр “Акпатыр” оперым темла”, - ойла Г.Ширяева.

Йошкар-Олаште погынымаш да делегат-влакым сайлымаш 26 февральыште лиеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: