"Илыш йогын" рубрик, 2016 ий, Пургыж тылзын 1-ше кечыже

Портышкемым чием – огеш кылме йолем

Статьян авторжо Анастасия Эманова

23 январьыште Волжский район Карай ялыште “Портышкем пайрем” моткоч веселан эртен. Изижге-кугужге ты кечын курык гыч издер дене мунчалтен, ече дене таҥасен, тӱрлӧ модыш дене модын да марий сем почеш муралтен-кушталтен. Уло Карай весела йӱк-йӱан дене темын. Пырля канен, пайремым эртарен, икоян улмынам, калыкнан йӱлажым да тӱвыражым пагалымынам ончыктенна.

DSC_6295Ты мероприятийым “Кугарня” ден “Марий Эл” газет редакций-влак Карай школ дене пырля республикыштына кокымшо гана эртареныт. Пайремыш вес район гычат уна-влак толыныт.

Тиде кечын чыла еҥ гаяк портышкемым чиен. Йолыштышт тунар чот моторын коеш – ончен куанет. Иктын портышкемжым тасма дене сӧрастарыме гын, весын – шер дене, марий тамган йолчиемат шагал огыл лийын.

Карай школончылно лум дене кок коҥгам оптымо. Школышто портышкем да ты юзо йолчиемлан пӧлеклалтше сӱрет выставке-влакым чумырымо, презентаций ончыкталтын. Изирак класслаште тунемше йоча-влак сувенирлык портышкемым йӧрымӧ шотышто мастер-классым эртареныт. Йоча-влак ончылгоч шке гыч ямдылыме “валенки-шептуны” сувенирым ужален шогеныт. Пеш чаткан, шӱм шокшыштым пыштен ыштеныт. Тыгай пашам кузе от нал? Мыланем Наташа Захарован ыштыме портышкемже келшыш. Ӱдыр 8-ше классыште тунемеш. Кидпашалан кумылан: пидаш, меж гыч тӱрлым йӧраш йӧрата. Тыгак ече дене талын коштеш, школысо спектакльыште модеш. Ончыкшым врач лияш шона. “Йолташ ӱдырем Лиза Медведева дене спектакльлаште модына, ече дене кошташ йӧратена, Лиза тыгак ансамбльыште пу совла дене тӱрлӧ семым луктеш”, - ойла ӱдыр. Наташа ден Лиза сувенирымат пырля ужален шогат. Школым тунем пытарымеке, коктынат врач лияш шонат.

DSC_6503Портышкем пайремым торжественно почмашке Пӧтъял ял шотан илемым вуйлатыше Г.А.Романов, Волжский район администрацийым вуйлатышын алмаштышыже-влак Е.Н.Овчинникова ден Т.А.Ильина толыныт.

Портышкем пайрем годым сӱрет конкурсым иктешлыме. “Йоча-влак конкурсыш кумылын ушненыт. Чыла паша сылне, садлан сеҥышым палемдаш неле,” - мане школ директор Любовь Анатольевна Сергеева. Сеҥыше-влак радамыш шуко икшыве логалын, жюри чылаштлан диплом ден изирак пӧлекым кучыктен.

Коваже кидпашалан туныктен

Тӱҥалтыш класслам туныктышо Ирина Валериановна Артемьевам школышто Марья-Ирина Искусница маныт. Тудо тӱрла, урга, пидеш, оригамим да тулеч молымат ышта да икшыве-влакым кидпашалан кумылаҥда.

Ирина Валериановна Волжский район Олыкъялеш туныктышо ешыште шочын. Ачаже Карай школышто географийым да биологийым туныктен, аваже – руш йылме ден литературым. Карай школым тунем пытарымеке, Волжск оласе 2-шо №-ан школысо педклассыште воспитательлан ик ий тунемын. Вара Йошкар-Оласе 6-шо №-ан профессиональный училищыш ургызылан тунемаш каен. Туныктышо карьерже шочмо ялысе школышто тӱҥалын. Тушто тудо ик ий тӱҥалтыш класслам туныктен. “Кӱшыл образованием лийын огыл, садлан ончыч неле лийын. Шайра кыдалаш школышто кок ий ыштымеке, Крупская лӱмеш пединститутыш тунемаш пуренам. Вара илыш пӱрымаш Учимсола школыш конден. Ынде 2004 ий годсек Карай школышто туныктем”, - манеш И.В.Артемьева.DSC_6732

Ирина Валериановна изинек сӱретлаш йӧрата. Кидпашалан тудо коваже Наталья Алексеевна деч тунемын. “Изинек тудын пелен кушкынам, манаш лиеш. Вич икшыве лийынна, мый мӧҥгысӧ сомылым ыштен пытарымеке, ковам деке куржам ыле. Тудо мыйым пидаш, тӱрлаш, перемечым кӱэшташ, кӱнчылам шӱдыраш туныктен. Эн ончыч межым шӱдырыктен огыл, тудым локтылын кертам манын ойлен, а кӱртньӧ койко вуеш мушым кылден пуа да шӱдырымӧ пашам кандыралан йӧра манын”, - каласыш туныктышо.

И.В.Артемьева тӱрлӧ кидпашалан туныктымо газет дене журнал-влакым налеш. Школышто тӱҥалтыш класслаш икшыве-влаклан кружок занятийым эртара. “Олым гыч панном ышташ, газет гыч тӱрлӧ корзиҥгам пидаш тунемына. Йоча-влак “валенки-шептуны” сувенирым ышташ йӧратат. Тений портышкем пайрем вашеш кугурак класслаш коштшо ӱдыр-рвезе-влакат меж гыч йӧраш кумылаҥыныт. Тыгай сувенирым пӧлек шотеш кучыкташ лач толеш. Ик портышкемыш тыгыде оксам пыштыман, а весышкыже – пырчым да шонымашым шып каласен, мужыр портышкемым омса ӱмбаке пижыктыман. DSC_6829

Ме тасма, кагаз, шӱртӧ гыч тӱрльым ыштена да районысо выставкылаште ончыктена. Тыгак ӱмаште шошым Йошкар-Олаште кидпаша ярмиҥгаште участвоватленна”, - ойла мастар еҥ.

Школышто вашлиймаш деч вара уремыш лекна. Тушто изирак ярмиҥга лийын, ужалыше-влак портышкемым да моло сатум темленыт.

Кумылан-влак сонарзе ече дене таҥасеныт, портышкемым торашке кышкеныт, курык гыч издер дене мунчалтеныт да эше тӱрлӧ модыш дене модыныт. Куштымаш флешмоб ӱдыр-рвезе-влак дене пырля кушташ “ӱжын”. IMG_0709

Весела пайрем Карай тӱвыра пӧртыштӧ кугу концерт дене пытен. Тӱвыра пӧртын усталык коллективше, Елена Кондратьева, Марий тӱвыра рӱдерын “Волгыдо” ансамбльже, Олег Бакутов ден Аделина Батаева муреныт.

Портышкем ожнысек калыкын эн йӧратыме йолчиемже лийын. Кеч-могай чатлама йӱштӧ теле лийже, тудым чиен, йол садыгак ок кылме. Портышкем шокшо, пушкыдо да куштылго.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: