"Илыш йогын" рубрик, 2016 ий, Пургыж тылзын 19-ше кечыже

«Роснефтьыште» эн сай оператор

Статьян авторжо Ирина Степанова

Елена Газина возен.

денис 2Марий-влакым чыланат пашам йӧратыше калыклан шотлат. Тидым ӧрдыж кундемлаште пашам ыштыше-влакат пеҥгыдемдат. Декабрьыште социальный сетьыште марий ӱдыр-врезе-влак ик видеосюжтым ончышт. Могайым? Чылажымат раш каласкалем.
Шонем: газетым лудшо-влак калыкнан чолга эргыже нерген палышаш улыт. Мишкан районеш шочын-кушшо, кызыт Йӱдвел кундемыште тыршыше рвезе нерген Нефтеюганск оласе телекомпанийын пашаеҥже-влак передачым ямдылен. Тидлан шыжым кугу амал лийын — Самара олаште «Роснефть» компанийын эртарыме «Профессийыштыже эн сай» смотр-конкурсышто «Нефть ден газым тулымаште эн сай оператор” номинацийыште Денис Шакиров 1-ше верым налын. Конкурсыш Роснефтьын 96 дочерний обществыж гыч 700 наре специалист чумырген. Денис 20 оператор коклаште шке моштымашыжым терген да, чыла заданийым шуктымек, эн сай результатым ончыктен, сеҥышыш лектын.
Рвезе Тымбай ялеш шочын-кушкын. 9-ше класс деч вара Нефтекамск оласе нефтяной колледжыш тунемаш пура да ныл ий гыч тудым йошкар диплом дене тунем пытара. Вара армийыш налыт, воздушно-космический обороно войскаште службым эртен.
24 ияш самырык рвезылан сеҥымашке шуаш мо вийым пуэн? Предприятийым вуйлатыше Денисын цельым шынден да тудын дек шуын моштымыж нерген палемда. А эше — изи годсек авалан эҥертыш лийын кушмыжо.
- Ачамын илышыже самырыкак кӱрылтӧ, мылам индеш ий ыле. Тудо телемастер лийын. Авана Лариса Александровна йочасадыште пашам ыштен. Шольым дене когыньнам ончен-куштыш, образованийым пуыш. Мемнан шочмо суртна гыч тораш кайымекына, аванат Йӱдвелыш илаш кусныш. Кызыт шольымат воктенемак пашам ышта, — ойла рвезе.
Тыгай конкурсышто вийым тергымаш, мутат уке, чылалан профессионально кушкаш полша. Вуйлатыше-влак, марий рвезын тыршымыжым шотыш налын, шукерте огыл старший технологлан шогалтеныт. Денис шке предприятийже нерген кугешнен ойла: «Юганскнефтегаз» — «Роснефть» компанийын эн кугу ужашыже, нефть ден газын ик чырык (1/4) ужашыжым ме луктына».
Тудо, паша деч кӱрылтде, Уфасе нефтяной университетыште «Нефтегазовое дело» факультетыште кӱшыл шинчымашым налеш. Школ гычак спортым йӧрата, пашам ыштыме цехшын куштылго атлетике дене командыште улеш, икмыняр гана управленийын чапшым тӱрлӧ спартакиадыште арален, футбол денат модеш.
Кумылан-влак, шонем,тиде видеосюжетым муын ончен кертыт.
Елена Газина.
Нефтекамск.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: