"Рубрик деч посна", 2016 ий, Пургыж тылзын 15-ше кечыже

Сӱрет тӱням шижаш да умылаш манын…

Статьян авторжо Эльвира Терентьева

Национальный художественный галерейыште “Творческий галерей” студий кодшо ийын почылтын. Тудо кум направлений дене пашам ышта: живопись, сӱрет да фарфор дене роспись. Ӱян чия дене живописьлан да фарфорышто росписьым ышташ Полина Метелькова туныкта.

“Тыгай курслашке кеч-кӧ тунемаш толын кертеш, нимогай опыт огеш кӱл, лач кумылет веле лийже. Йӧршеш моштыдымо еҥ-влак толытат, моткоч сылне сӱретым сӱретлат да куанен каят” манмыж деч вара шкаланем экспериментым ышташ шонен пыштышым. Вет школышто тунеммем годым “Рисований” предмет дене четвертьлан эре гаяк “кумытан” отметкым шынденыт. Эше 10-11 педклассыште тунеммылан кӧра ты предметым пуртеныт ыле, но тунамже, чояланен, “4” отметкым налын моштенам. Полинан каласымыжым пеҥгыдемдаш “Живопись маслом” манме курсышко арнялан ик гана кушкыжмын кошташ тӱҥальым.

Теве тыге туналын чылажат Туныктышына нерген

Самырык сӱретче-керамист Полина Метелькован пашаж дене “Волга молодая” выставкыште палыме лийынам ыле. Чолга да пашаче ӱдыр шке творчествыштыже тӱрлӧ направленийым кычалын, а пашам ыштен моштымыжо сымыстарен. А вара кеҥежым Крымыште эртыше “Таврида” образовательный форумышко Марий Эл Республик гыч лач ик талантан сӱретчым – Полина Метельковам – ойырен колтеныт. Тидыже сомылжым вияҥдымаште утларак вий-куатым ешарен. Вет ӱдыр Национальный художественный галерейыште пашам ышта, тӱрлӧ проектым пашам илышыш шыҥдарен толеш. Ты заведений тӱвыран ятыр шӧрынжым ончыкташ. Пашаеҥ-влакын тыршымашышт шижалтеш, тыште тӱрлӧ мастер-класс лийыт.

Ме нылымше группо улына

Йошкар-Олаште кугыеҥ-влакым сӱретлаш туныктышо курс але марте лийын огыл ыле. Тиде пашам галерей ворандарен колтен. Ынде кугу кумылым пелен налыт да икмыняр тӱжем теҥгем кӱсенышке пыштен, Полина Метелькова деке ӱян чия дене чиялташ, фарфорышто росписьым ышташ але шун гыч ненчаш тунемаш каяш йӧн уло. “Сӱрет” курсышто преподавательлан Лариса Илтубаева пашам ышта.

Тышке тунемаш толшо-влаклан картиным возаш радына деч посна моло материалым налме ок кӱл, лач тунеммылан гына оксам тӱлыман. А ик радына 500 теҥге наре шога. 12 занятийыште тунемше-влак кок (южгунам кум) сӱретым шочыктат. Такшым сымыктыш тӱняште шкем терген ончаш да сӧраллыкым шочыкташ шонышо-влак еҥ-влак кумылын ушненыт. А кумылан-влакым галерейыште вашлияш ямде улыт. Ме, январь гыч апрель марте тунемше 11 еҥ, “Живопись маслом” курсын нылымше гана погымо тӱшкаже улына.

Ик занятий шагатат 30 минут шуйна. Тушто ме тӱрлылан тунемына: чиям кучылт мошташ, иктым весе дене вараш, растушевкым ышташ. Тыге эркын-эркын картине шочеш. “5-6 занятийыште ме ик картиным, кодшо занятийлаште весым сӱретлен шуктышаш улына”, — каласыш профессионал туныктышына Полина.

Галерей курч гыч фотоЧыла кумылан еҥым ӱжыт:

- “Живопись маслом” занятийыш. Ик шагатше — 300 теҥге,

- “Живопись маслом за 3 часа” занятийыш (1100 теҥге)

- “Роспись фарфора” занятийыш (450 теҥге),

- “Рисунок” курсыш -

- “Роспись по стеклу” занятийыш (200 теҥге),

- Декупаж технике дене пӧлекым ышташ (150 теҥге),

- Шке кид дене шагатым ышташ (250 теҥге),

- 5-7 ияш йоча-влакым “Мир вокруг нас” тоштер программым ончаш (150 теҥге).

Йодыш лектеш гын, 41-10-27 телефон дене йыҥгыртен йодын кертыда. Тыгак https://vk.com/topic-79539983_31444256 сайтыште нине курслашке возалташ йӧн уло.

Роман Чухин:

- Такшым Роман Чухинпрофессием дене математик улам, IT-сферыште пашам ыштем. Кодшо ийын “Живопись маслом” курсышко куанен коштым. Тунам мый йӧратыме пелашемын портретшым возышым! Мыйым тиде тунеммаш кандарыш, куандарыш да у опытым погаш полшыш. Полиналан занятийым эртарымыжлан да шергакан ой-каҥашым пуымыжлан тауштем. Тыгай сылне тӱняшке логалаш, иктаж-кӧлан сай пӧлекым ышташ да уло чон дене каналташ шонышо-влаклан тиде курсыш кошташ темлем:[https://vk.com/topic-79539983_31382689]

Полина Метелькова:

- Чылан йочашт годымак сӱрелаш тӱҥалыт, а мый эше тӱрлӧ янлыкым ненчаш тунемынам. Кочам Юрий Петрович Метельков самодеятельный художник. Тудым шарныме лӱмеш иктаж гана выставкым чумырем манын шонем. Тудо акварель дене сӱретлен. Тудак художественный школ корным ойырен налаш полшен. Ме экзаменыш пырляк каенна, тыге мый 5-9 класслаште художественный школышто тунемынам.

Шкеже кызыт сӱретче семын огыл, а керамикыште росписьым возаш ден шун гыч ӱзгарым ышташ кумылаҥынам. Мӧҥгыштем кызыт пашам ышташ ик лукым ямдыленам, тӱрлыжым ненчем да шун гыч тӱрлӧ ӱзгарым ыштем.

Ойлат, йырым-ваш улшо тӱням ме шке сылнештарышаш улына. Сандене галерейыште эртыше курс ден мастер-класс-влак тидлан моткоч полшат, шонем.

Тиде курсышко мыят уло кумыл дене коштам. Ик шагатат пеле жап моткоч писын кая. Самырык туныктышын тидым тыге, а тидым туге сӱретлыман, ик чиям весе дене ушыман манмекыже, сӱрет шочеш… Ты арнян нылымше гана занятийыш мийымеке умылышым: сӱретем сылнак лектешыс. Куан нмучашдыме. Ик ганат радынашке сӱретым возен ончыдымо еҥлан поснак куанлын чучеш…

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: