"Рубрик деч посна", 2016 ий, Пургыж тылзын 15-ше кечыже

Тый дечет посна мый шулдырдымо кайык

Статьян авторжо Эльвира Терентьева

Анита Феоктистова (студентка, мурызо):

- Ме пелашем дене кеч ик кундемыштак иленна гынат, тудым ончыч пален омыл. Тудо Марий Турек школыш, а мый Марий Купто школыш коштынна. Клубыш коштынам да ужынам гынат, тиде эргын лӱмжӧ Дима манын пален омыл… 2012 ийыште интернетыште тудо возыш: “Салам, мо мылам отат возо». Мый ялтак ӧрым. Тылеч вара палыме лийынна. Вашла возкалымеке, умылышым: тиде рвезе мыйын огеш лий гын, ушем кая. Тудо мыланем келша манын, уло чонем дене шижынам. Изиш варарак келшаш тӱҥалынна, коклашкына шукын шеҥын пураш толашеныт, но йӧратымашнам пужен кертын огытыл.

Анита

Кум ий келшышна, кодшо ийын 5 декабрьыште сӱаным ыштышна. Шуко амаллан кӧра ты жапым эре шуйышна… Молан ялысе рвезе йодыда гын, тыге вашештем. Кызыт ӱдыр-влак кӧн оксаже шукырак, кӧн пӧртшӧ моторрак, кӧн машинаже шергырак ончат, но мый тыгай омыл, эн ончыч айдемын кӧргӧ вийжым аклем. Мыйын шонымаште, ме чыла пырля эркын-эркын погена.

Сӱанна пеш веселан эртыш: ӱдырым тӱлен налмаш лие, загсыште войзалтна, вара качымарийын суртшо гыч Йошкар-Олашке лектын кудална. Тушто мемнам рестораныште тамада да шуко йолташна вученыт. Тылеч варат йолташна-влак дене пырля вес верыш каенна, ик клубышто вип-зоным бронироватлен ыльна. Тыге кандаш шагат эр марте куштен- мурен, сӱаным оҥайын эртарышна.

Каласыман: фотограф ден видеоператор-влакат шке пашаштым ыштеныт. Мыйын шонымаште, оксам чаманыман огыл, сӱанным ыштыманак, тиде вет уло ӱмырлан шарнымаш кодеш. Пелашем пеш йӧратем, арамак огыл, кок мурем тудлан пӧлекленам. Чылаже кум мурем уло. Нунылан мутым шке возенам.

Дима клиплаштем тӱҥ рольым модеш, мылам келша, артист семынак шкенАнита2жым куча, ок вожыл. Мый школ годсекак сценыште чӱчкем, а тудат мыйын пеленем тунемеш веле. Илышыште эн тӱҥ — тиде йӧраташ да йӧратыме лияш. Йӧратет гын веле чонет ила.

Анастасия Отмахова (сӱретче):

- Пытартыш кок ийыште кажне эрдене пашаш каяш тарваныше ик айдемым окна гыч эскеренам. Вара рашемденам: тиде пошкудо подъездыште илыше палыме оперный мурызо Евгений Розов. Тыге икмыняр жап туддене мутланен ончаш шонен коштынам. Мый вученам тиде татым да вучен шуктенам.

Икана мастерской гыч пашам ыштен толмекем, тудо машина воктеныже шогылтын , вара мыйым машинаж дене шынден наҥгаен. Тыге кутыркалаш да келшаш тӱҥална, вет ме коктынат творческий еҥ улына, пӱртӱсым йӧратена…

Настя Отмахова и Розов

А пел ий гыч кодшо ийын 5 декабрьыште сӱаным ыштышна. Моткочак куанле тат сӱан ыле. Тидлан сӱанлык тувырлан дизайнер семын шкеак пашам ыштышым, кӱлеш куэмым кычал коштым, тудым кум кевытыште нальым. Урген моштем, сандене тиде шонымашем вес еҥлан шукташ шым ӱшане.

Сӱанлан коктын куштымашым ямдылышна, вет тудо профессионал мурызо да куштызо (кӧ огеш пале Марий Элысе тӱвыран сулло артистше). А мый кушташ йочасадыштак моткоч йӧратенам, а школышто тӱшка дене пырля иктеш куштен кертдымылан кӧра налын огытыл. Мужыраҥме пайремышкына 20 еҥ веле ыле гынат, тудо моткоч шкешотан да сӧралла чучо. Йолташ ден родо-влак кокла гычак мурызо, видеоператор, фотограф, водитель да молат лийыныт. Сӱаныште чылан куштеныт, муреныт, тӱрлӧ модышым эртареныт. Кушташ шуко вер кӱлын, тыгай пӧлеман кафем Кокшайскыште верыштынна. А Шнуй Валентинын кечыжлан рестораныш каена да вашла пӧлекым ыштена.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: