"Кузе илет, ялем?" рубрик, 2016 ий, Пургыж тылзын 26-шо кечыже

Чонлан чылажат келша

Статьян авторжо Иван Речкин

Ял1Таче ялыштат моткоч сайын илаш лиеш. Пашам ышташ гына ит ӧркане. Тыге ойлат Шишкинмыт.

Марий Эл ялозанлыкын сулло пашаеҥже Евгения Семёновна Шишкина У Торъял район Шуйдур ялеш шочын. У Торъял посёлкышто школым тунем пытарен. Шочмо «1 Май» колхозышто специалист семын пашам ышташ шонен, Ежово селасе Марий совхоз-техникумыш тунемаш пура да икмыняр ий гыч ветеринарный фельдшер лиеш.

Колхозышто пашам ышташ тӱҥалмеке, пошкудо Шемермучаш ялын чолга эргыже, шофёр, гармонист Александр Викторовичлан марлан лектеш. Шым ий вате-марий марийжын мӧҥгыштыжӧ выче-выче илат. Тиде жапыште нунын кок эрге, Рудольф ден Володя, шочеш. Еш кугемме семын самырык вате-марийын илыме верым уэмдаш да мыняр-гынат тудым кугемдаш  шонымаш лектеш. Нуно Кугу Шӱвылак ялысе Корембал уремыште кугу да йоҥгыдо пӧртым чоҥат, оралтым чумырат.

Ял5Александр — «1 Май» колхозын уста, пашам йӧратыше водительже, вара — техникын «шӱм-чонжым» топливный аппаратуржым — чаплын ачалыше мастарже. Женя — шке пашажым сайын палыше ветфельдшер. Эрге-влакат кушкыт. Офицер лиеш да мӱндыркӧ кая Рудольф. Техник-механик  специальностьым налеш Йошкар-Оласе совхоз-техникумышто Володя, да тудат икмыняр ийлан Йӱдвел кундемыш пашашке миен толеш.

Таче Шишкинмыт еш Кугу Шӱвылак ялыштак ила. Александр Викторович ден Евгения Семёновна сулен налме канышыште улыт. Пеленышт пашалан кожмак 35 ияш  Володя  эргышт да  кокымшо классыште тунемше Кристина уныкашт улыт. Таче ойгырыде илаш нунын чыла уло. Паша да сай пашадар лийже манын, Володя шканже МТЗ-80 «Беларусь» тракторым налын, индивидуальнй предприниматель семын тӱрлӧ пашам шукта. А.В.Шишкин ончычракак ЗИЛ самосвалым налын. Ялысе изи озанлыкыште техникын полышыжо пеш кугу. Ӱмаште кеҥежым у кок пачашан, кызытсе пагытлан келшыше, чапле дизайнан пӧртым кум тылзе жапыште ыштыме годым технике, ойлыманат огыл, пешак кугу «шӱкалтышым» ыштен.

Ял2Кызыт икоян  еш у полатыште ила. Тушто кумда холл, кухня-столовый, ванне-туалет, волгыдо зал, малыме пӧлем-влак улыт. Еш кок ушкалым, сӧснам да кайыквусым ашна. Александр Викторович йодын толшо-влаклан машинасе топливный аппарат ачалыме пашам чӱчкыдын шукта. Сай мастарым тиде кундемыште веле огыл, тора могырыштат палат.

Вате-марий кушташ да мураш кумылан улыт, Кугу Шӱвылак тӱвыра пӧртысӧ самодеятельный коллективыш коштыт. Районысо яллашке концерт дене чӱчкыдын лектыт.

Ял4Евгения Семёновна тӱрлаш, кухньысо пашам ышташ да окна садым ончаш моткоч йӧрата. Тудын кидпашажым чыла пӧлемыште ужаш лиеш.  Нуно палынак пӧрт кӧргым сылнештарат, толшо уна-влаклан  пӧлек шотеш кучыкта. А кеҥеж шуэш гын, эр гыч кас марте — пӧрт воктенысе пакчаште. Сӧрал деч сӧрал пеледышым, чапле деч чапле саскам кушта. Икманаш, Евгения Семёновна пашам йӧрата, илышлан шке ешыже семынак  кажне кечын йывырта. Ялыште шочмыжлан,  шӱмбел кундемыште ӱмырым паша дене кылден эртарымылан куанен ила.

Иван Речкин.

Авторын фотожо-влак.

Комментарий-влак:

Комментарийым ешараш:

Войти с помощью: