"Илыш йогын" рубрик, 2016 ий, Пургыж тылзын 18-ше кечыже

Чоным тачат корштара Афганистан

Статьян авторжо Ирина Ямбаршева

Корамас315 февральыште Волжский район Кугу Корамас школышто Афганистан гыч совет войскам лукмылан 27 ий теммылан пӧлеклалтше кас эртен. Школыш Афган сарын участникше-влак толыныт.
Корамас4Погынышо-влак, тиде пуламырыште шке вуйыштым пыштыше совет воин-влакым шарналтен, ик минут шып шогеныт. Вара тунемше-влак сарын шучкылыкшо нерген ойленыт. Афганистаныште совет салтак-влак шке интернациональный порысыштым тӱрыс шуктеныт. Но тыгодым шуко еҥ колен. Терроризм дене кылдалтше событий-влак ончыктат: сай илыш верч чот шогыман. Корамас2Лӱдыкшӧ кушеч толмым ончылгочак ужын моштыман да тидын ваштареш кӱлеш задачым жапыштыже шуктыман. Тӱнямбалне кугу пуламыр ынже лий манын, Корамас1Россий президент В.В.Путин да правительстве кугу пашам шуктат. Тиде шонымашымак пеҥгыдемденыт ты касын унаже-влак: «За отвагу» медаль дене наградитлалтше ончычсо спецназовец, Морко район Ердӱр ялын эргыже С.И.Рыбаков да Волжский район Корамас кундемын шочшыжо Г.С.Яндимиров. Нуно Афган сарын ветеранже улыт.
Тиддеч вара школ коридор пырдыжеш тиде событийлан ямдылыме фотостендым торжественно почмо. Тыште школым тӱрлӧ ийыште тунем пытарыше да Афган сарыште лийше 15 еҥын фотоштым вераҥдыме, тыгак Чечнясе пуламырыште лийше-влакын фотосӱретыштланат верым ойырымо. Вара школын тунемшыже-влак изирак концертым ончыктеныт. 10-шо классыште тунемше Снежана Николаева гитар почеш патриот шӱлышан мурым чон почын мурен.
Палемдыман: школышто тиде шарнымаш пайремым эртараш Корамас ялын эргыже, казак сотник М.П.Сергеев кугун полшен.

И.РЕЧКИН.
Авторын фотожо влак.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: