"Кугарнягудо" рубрик, 2016 ий, Пургыж тылзын 24-ше кечыже

Чон кумылым ылыжтыше вашлиймаш

Статьян авторжо редактор

Пургыж тылзын 19 числаштыже, шошо велыш тайныше чевер да сылне теле кечын, Эльвира Куклинан вуйлатыме «Самырык этножурналистын школжо» шке черетан заседанийжым «Кугарня» газет редакцийыште эртарыш.
Самырык-влаклан ямдылыме да моткоч йӧратен лудмо тиде газет калыкыште пагалымашым шукертак сулен. «Молан?»- йодышлан кугешнен каласем — лудшын йодмыжым шижын, калык чоным тарватен мошта, кӱлеш уверым намия. Теве тыгай «Кугарня» газет — мыйын умылымаштем.

А теве - селфи.

А теве — селфи.

Редакцийыште мемнам газетын тӱҥ редакторжо Э.Иманаев шокшо кумыл дене вашлие. «Кугарня» газет – самырык лудшын изданийже. Сандене тушто тудын илышыже тӱрыснек ончыкталтшаш. Тӱҥ пашанаже — лудшылан уверым, оҥай возымым намиен шукташ, лывырге да шыма марий йылме дене марий лудшылан шочмо калыкнан да тӱнямбал илышын вашталтмыж нерген палдараш. Тематикына пеш кумда, тӱрлӧ темым авалташ тыршена, тӱрлӧ проблемым тарватен, лудшым шонкалаш таратынена. Тыге у рубрика-влакат шочыт. Теве шукерте огыл «Чон почын…» лаштык ешаралте. Тыште илыш нелылыкыш логалше айдеме шке ойгыж дене палдара. Еҥ ончылно каласкалаш огеш тошт, ӧреш але вожылеш, а газет гоч тудо чонжым луштарен кертеш. Меже вес еҥ тыгай йоҥылышым ынже ыште, туткарыш ынже логал манын, тудын серышыжым савыктена», — палдарыш Эдуард Аркадьевич. Моло изданий семынак, «Кугарнянат» нелылыкше уло — подписке шотышто да окса чӱдылык. Подписке ак кугеммылан кӧра возалтше-влак эрежак огыт шукем. А кажне изданий шке йырже утларак лудшым чумырынеже. Санденак редакций пашаеҥ-влак эше электрон подпискым темлат. Пел ийлан возалтме ак 200 теҥгешке гына шуэш — газет кажне кугарнян электрон почтыш толеш. Тидыже тораште илыше-влаклан поснак йӧнан, тыгак — смартфон дене пайдаланаш йӧратыше-шамычланат. Газетым эсогыл телефон гоч лудаш лиеш, умыледа, могай виян тачысе технологий! Тыгай сай йӧн улмым пален налме деч вара мемнан кокла гычат Вероника Мустаева тунамак электрон подпискым ыштыш.
«Верыште огына шого, жап дене тӧр каяш тыршена, электрон технологий пашаштына чот полша», — мане Эдуард Аркадьевич да умбакыже газет лукмаште тыршыше пашаеҥ-влак дене палдарыш. Латныл еҥан коллективыште Марий Элын сулло журналистше лӱманат улыт. Ӱмаште, мутлан, Ирина Степанова тыгай сеҥымашке шуын.
Мемнан пагалыме да йӧратыме этножурналист школ вуйлатышына Эльвира Куклинат шке журналист пашажым «Кугарня» газет редакцийыштак тӱҥалын. Шым ий жапыште мастарлыкшым шуарен, тыглай журналист гыч тӱҥ редакторын алмаштышыже марте кушкын…
Мемнамат Эдуард Аркадьевич возаш таратыш, газетыш материалым колташ у кумылым лукто. «Лудаш да возаш вожылаш огеш кӱл, шке творческий кумылым шуарыман» манын каласыш.
Сандене ме манына: вашлиймашна пеш порын да пайдалын эртыш, чонышто сай шарнымашым кодыш, творческий шӱлышым лукто. Редакторын поро шомакшат, тамле сий-чайжат кумылемым ылыжтышт. Тау, «Кугарня», поро кумылетлан, чон таратыше шомакетлан! Тый денет у вашлиймашым вучем!
Ирина Павлова.

Комментарий-влак:

Комментарийым ешараш:

Войти с помощью: