"Рубрик деч посна", 2016 ий, Пургыж тылзын 19-ше кечыже

Шочмо йылмым ида мондо!

Статьян авторжо Эльвира Терентьева

 

Шочмо марий йылмына нерген ме эреак азапланена, Марий Эл Республикыште илыше марий ача-аван икшывыштым марийымак ыштынена. Но образованийыште лийше вашталтышлан кӧра пытартыш жапыште марий йылмым шочмо йылме семын тунеммаш шыгыремдалтеш, а йочасадлаште гын ты ешартыш занятий йӧршешлан кораҥдалте. Кӧлан да молан шочмо йылмына мешайыш – каласаш неле. Ынде кызыт ӧрдыж кундемыште илыше еҥ-влакын икшывышт марий йылмым утыр жаплат да тунемыт. Вес кундемласе чолга марий еҥ-влак акрет годсек марий йӱланам аралаш тыршат. Шочмо йылмым тушто таче кузе тунемме нерген икмыняр туныктышо дене кутырышна.

Тора Уралыште

Уралыште 24 тӱжем утла марий еҥ ила. Свердловск кундем Ачит районышто икана лийынам ыле. Тыште марий калык илыман тыгай ял-влак улыт: Патаммучаш, Уртавыл да Марий Карший.

Кызыт ты районысо Марий Карший школышто гына марий йылмым шочмо йылме семын тунемыт. Ты суапле пашам Марина Петровна Сташкина 23 ий шукта.

……………………………..

Музыкым, марий йылмым туныкта

Татарстан кундемыште марий-влак лу районышто, тыгак Озаҥ, Набережный Челна да моло олаштат илат. Тидыже чот шот дене — 20 тӱжем наре еҥ.

Анжелика Алексеевна Ахвалеева (снимкыште) Мензелинск районысо Калтак школышто 11 ий тӱҥалтыш класслам туныктен. Идалык ончыч тудын вачышкыже кугу ӱшан возын: йоча-влакым марий йылме ден литературым туныкташ.

…………………………………

Шорамучашыште чолга улыт

Татарстан кундем Арск районышто ик марий села уло – Шорамучаш. Тудыжо Параньга, Морко районла воктенак верланен. Шорамучаш школышто марий йылмым 1987 ийыште тунемаш тӱҥалыныт. Но 2011 ийыште зданийым тунемаш йӧрдымылан шотленыт да школым петыреныт ыле.

2012-2014 ийлаште тунемше-влак 10 меҥге торасе Новый Кинерь лицейыш коштыныт. Тунам чиновник-влак марий йылмым лицейыште туныкташ тӱҥалыт манын товатленыт улмаш. А чынже дене йоча-влаклан кружок веле лийын. Тыгай йӧн марий да татар ача-аваланат келшен огыл. Тунам тысе чолга туныктышо-влак верысе марий калык дене иктеш чумыргеныт да “Татарстаныште шочмо йылмым туныктымым чарнынешт” манме шонымашан серышым Татарстанысе калык-влакын ассамблейышкышт возен колтеныт. Арск районысо образований управленийын пашаеҥже-влак марий йылмым общеобразовательный программе почеш туныкташ тӱҥалаш мутым пуэныт.

Тыге Шорамучаш школ 2014 ий сентябрьыште шке омсажым уэш почо. Но кыдалашыш огыл, тӱҥ школыш савырныш. Олеся Игоревна Антипова марий йылмым кокымшо ий туныкта. Тылеч посна тудо тӱҥалтыш классын туныктышыжо. Оршанке педколледжым 2002 ийыште тунем лекме деч вара шочмо Шорамучашышкыже пӧртылын. Верысе йочасадыште воспитательлан лу ий пашам ыштен. Туштат марий ден татар ньога-шамычым марла да татарла кутыраш шӱмаҥден. Марий ӱдырын татарла туныкташ кумылан лиймыжлан калык тудым пагала.

……………………………………

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: