"Кугарнягудо" рубрик, 2016 ий, Пургыж тылзын 5-ше кечыже

Японецлан Марий Эл кокымшо мӧҥгыжӧ гаяк

Статьян авторжо Ирина Ямбаршева

Студент улмем годымак марла мутланыше японец уло манын колынам ыле. Иктаж гана палыме лияш гын, моткоч сай ыле, шоналтенам. Шукерте огыл вашлийна. «Кугарня» газетын поро йолташыже Танака Такасилан Марий Эл кокымшо мӧҥгыш савырнен. Тыглай марий деч «марларак» мутланыше еҥ шукерте огыл икмыняр кечылан Йошкар-Олашке ынде 22-шо гана толын каен.
такаси
Танака Такасим марий йылме деке руш йылме конден. Тудо тыглай япон ешыште шочын-кушкын. Японийыште кӱшыл образованийым оксала гына пуат, но тунеммаште чолгалыкым ончыкташ гын, оксам тӱлыдеат лиеш. Такаси лач тыгай студент-влак радамыште лийын. Школышто тунеммыж годым США-се ик колледжыште англичан йылмым тунемын. Мӧҥгӧ пӧртылмеке да аттестатым налмеке, ончыкшымат йот йылме аланыште лияш шонен.
- Тунам да кызытат англичан да руш йылме-влак тӱнямбалне эн кӱле-шан лийыныт да улыт. Шанче аланыштат эн сай статья да книга-влак лач нине йылмыла дене сералтыт. Англичан йылмым сайын паленам, садлан рушла тунеммем шуын. Токио оласе йот йылме кугыжаныш университетыш тунемаш пуренам. Руш йылмым англичан деч нелыракын тунемынам. Но университетым тунем лекмеке, руш семынак мутланен кертынам, — каласкала Такаси Танака.
Такаси1Ныл ий университетыште тунеммеке, аспирантурыш пурен. Лач туштак марий йылмым шымлаш тӱҥалын. Японийыште Российыште илыше калык-влакын йылмыштым шымлыше ученый Накамуро-сан уло. Тудо Такасилан финн-угор йылме-влакым тунемаш кок университетым темлен: Ленинградысе кугыжаныш университетым да МарГУ-м. Такаси МарГУ-м ойырен налын.
- Марий йылмым тунемаш, мыйым рушла манмыла «научный интерес» таратен. Адакшым марий да япон йылмылаште икгайлыкым кычалынам, — ойла японец.

Тачысе ужмо сӱрет куандара
1992 ийыште икымше гана марий мландыш толын. Тунам тудо Марий кугыжаныш университетыште студент-влаклан англичан йылмым 11 тылзе наре туныктен. Йылмымат сайын палаш тӱҥалын.
Ты жапыштак Такасим Йошкар-Ола воктен ик ялысе тӱҥалтыш школыш наҥгаеныт. Тудлан шочмо йылме дене мутланыше йоча-влакым ужаш моткоч келшен. Чаманен каласа, икмыняр жап гыч марла мутланымым шагалрак колын. Но кызытсе ужмо сӱрет тудым куандара. Школлаште марла кутырат але уке — тидым огеш пале, но уремыште марла кутырен ошкылшо-влакым ужеш.

Марий йылме корпусым ышташ темлен
Таче тудо кок вере пашам ышта. Токио оласе йот йылме университетыште рекламе пӧлкаште тырша. Тыгак ик школышто туныкта. Университетыште икмыняр жап преподаватель лийын. Тунам руш йылмым тунемше ик студент марий йылме дене дипломым возен. Такаси тудым Йошкар-Олашке конден. Студент марла возымо вывеске-влакым шымлен.
«Япон марий» ты гана тӱрлӧ мероприятийыш пурен лектын. Марий калык конгрессын конференцийыштыже лийын. Исполкомын еҥже-влак ончылно марий йылмым тунемме корпусын кӱлешлыкше нерген ойлен.
- Руш але англичан йылмым тунемаш тыгай корпус-влак улыт. Садлан тыландат кӱлеш. Марий мутым тӱрлӧ семын кучылтмым палаш йӧнан лиеш, — каласен тудо.

Марий Эл радиом корнышто колыштеш
Такаси марий СМИ-влакым эскерен шога. «Кугарня» газетым тудлан МарГУ-н преподавательже В.Максимов почто дене колтеден. Кызыт газетым интернетыште лудеш.
2013 ий гыч Марий Эл радиом интернет гыч колышташ тӱҥалын. Ондак тудын паша верыштыже шке кабинетше лийын. Тушто кече мучко гаяк радио йоҥген. Кызыт тӱшка пӧлемыште шинча, садлан радиом кугу йӱк дене колышт огеш керт. Паша верыш кайымыж годым телефонышто интернетыште радиом колыштеш.
- Мӧҥгыштӧ шагал колыштам, пелашем кычалтылеш, — мыскарам ышта Такаси.
Такаси Танакан Марий кундемыште шуко йолташыже уло. Тышке толмеке, кажныж деке пурен лекташ жапшат огеш сите. Нунын дене тудо интернет гоч кылым куча. Серыш-влакым возкала, скайплан эҥерта.
Палымыж дене Йошкар-Олаште вашлийын
Икана МарГУ-ш студент-влак дене вашлиймашке ӱжыныт. Тушто ик студент Японийыште акам ила манын каласен да тудын телефон номержым пуэн. Такаси тудым Токио олаште кычал муын да палыме лийын. Икмыняр жап гыч адакат Марий Элыш толын. Тудлан Йошкар-Олаште ик эн чапле япон ресторан улмо нерген каласеныт. Такаси тушко кочкышым тергаш каен. Ресторан озан пелашыже Токиошто вашлийме ӱдыр лийын. Нуно Японий гыч тышке илаш толыныт улмаш.
Такаси, университетым тунем лекмеке ешаҥын. Кок эргыже уло. Марий да япон ӱдырамаш-влак коклаште могай икгайлык улмо нерген йодышлан тыге вашештыш:
- Коктынат талын вурседыл моштат.
Йошкар-Олаште ыштыме ролл ден суши-влак нерген лӱмынак йодым:
- Кочкаш огеш лий манын ом ойло, но кочкаш ом темле.
Шке оксажым кучылтеш
Такаси икмыняр кечылан гына кундемышкына толын. Тудо Марий Эл Республикыш кажне гана уло кумылын вашка. Ондак иктаж-кӧ окса дене полшен гын, кызыт шке оксажым кучылтеш.
- Марий мландыш толын кайыман. Тыште марла мутланем, верысе калыкын илышыжым эскерем. Ты гана шукыракат илем ыле, но окса шагал, — мыскарам ышта Такаси Танака.
Денис Очиев.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: