"Рубрик деч посна", 2016 ий, Ӱярня тылзын 18-ше кечыже

Антибиотик: пайдамат, зиянымат конда

Статьян авторжо Светлана Кушакова

15 март – Потребитель-влакын праваштым аралыме тӱнямбал кече.

Кажне ийын тудын тематикыжым Потребительский организаций-влакын тӱнямбал федерацийышт палемда. Ты гана тиде кече “Меню гыч антибиотикым кораҥдаш” девиз дене эртен. Тидыже айдемын тӱрлӧ инфекций ваштареш антибиотик полшымо дене эмлалтмыж дене кылдалтын огыл.

Антибиотик айдеме организмыш тыгак кочкыш дене пырля логалын кертеш. Тиде эмын организмлан пайдам да эҥгекым кондымыж шотышто шуко ӱчашат. Чынак, тудо черым эмлаш полша, тунамак организмлан кӱлшӧ микрофлорым пытара. Пытартыш жапыште микроорганизм -влак антибиотиклан тунем шуыныт, сандене эмын пайдалыкше иземаш тӱҥалын. Тидыже инфекций дене черланен колымаш ешаралт кертмым ончыкта.

Лач тиде темым 15 мартыште Роспотребнадзорын республикысе управленийыштыже каҥашеныт. Ветеринарий кугыжаныш комитетын да ветеринарный надзорын пашаеҥышт лийыныт.

Ялозанлык сферыште антибиотик кумдан кучылталтеш — утларакше чывым да сӧснам ончен куштымаште. Шымлызе-влак ойлат, тыгай препарат шылыште, кол да моло теҥыз продуктышто, шӧр да шӧр продукцийыште, мунышто, мӱйыштӧ палдырна. Вольыкым да чывым ончымаште антибиотик чер ваштареш аралалташ кучылталтеш. Вольыкым шӱшкылмӧ деч 7-10 кече ончыч жапыште тыгай препаратым пуымым чарныман. Мокшышто да вергыше тудо утларакше аралалт кодеш. Кол шуко жап аралалтше манын, антибиотик кучылталтеш.

Вольыкым антибиотик дене эмлыме годым препарат шӧрышкӧ, мунышко логалеш.

Вольыкым эмлымаште чӱчкыдын левомицетин, стрептомицин, пенициллин, тетрациклин радамыш пурышо антибиотик-влак кучылталтыт.

Айдемылан эҥгекым кондаш огыл манын, кугыжаныш могырым шыл, чыве шыл да моло кочкыш эреак тергалтыт. Республикысе ветеринарий комитетым вуйлатышын алмаштышыже В.Вавилова тергыме паша радам дене палдарыш да антибиотик улмо шотышто чыла эртарыме шымлымашын результатше сай улмым пеҥгыдемдыш.

Икманаш, республикыште ямдылыме шыл, чыве шыл да моло продукций тазалыклан эҥгекым огыт кондо.

Республикысе потребитель-влакым моло йодышат тургыжландара. Февральыште, мутлан, управленийын “шокшо линийышкыже” 154 йодыш пурен. Йыҥгыр-влак тӱҥ шотышто уда сатум ужалыме, ЖКХ, быт, медицине, финанс, транспорт услугым налме дене кылдалтыныт. Эн шукыжо Йошкар-Ола, Медведево район гыч йыҥгыртеныт.

Тенданат йодышда уло гын, консультацийым (8362) 68-19-44, 8-800-707-61-77 телефонла дене йыҥгыртен налын кертыда.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: