"Сылнылык тӱня" рубрик, 2016 ий, Ӱярня тылзын 11-ше кечыже

Йӧратымаш да кӧгӧрчен-влак илаш туныктат

Статьян авторжо Татьяна Иванова

М.Шкетан лӱмеш Марий театр 1919 ий 29 ноябрьыште шочын. Туныктышо энтузиаст-влак А.Белков ден И.Беляевын тыршымыштлан кӧра кусныл коштшо театр Тыныш Осыпын «Закон шумлык» пьесыж почеш спектакльым ончыктен. 2019 ийыште Марий театрлан 100 ий темеш.

Кызыт кугу полатын сценыштыже В.Гуркинын пьесыж почеш шындыме «Йӧратымаш да кӧгӧрчен-влак» спектакльым ончыкташ ямдылалтыт.

Театрын тӱҥ режиссержо Роман Алексеев дене тиде да моло нергенат мутланышна. Каласыман: актер да режиссер В.Меньшовын кумдан палыме «Любовь и голуби» кинокартиныжым пачаш-пачаш онченна. Ынде тудым вашке театрын сценыштыже ужына. Тиде шкешотан неле да ответственный пашам вачӱмбакше Роман Юрьевич шкеак налын. IMG_6472_1

«У премьерым 17 мартыште ончыктена. Материал — «Йӧратымаш да кӧгӧрчен-влак» — кинофильм почеш чылалан палыме. Театр — вес тӱрлӧ искусство, мо фильмыште ончыкталтеш, сценыште шукыж годым чылт киносыла ышташ ок лий. Кажне артист тӱҥалтыш гыч мучаш марте шке образшым чоҥа, рольжым модеш. Спектакльыште 80-шо ийласе историй, чыла действий ялыште эрта. Марий ден вате илат, йӧратат, кум икшывышт кушкеш, пошкудышт оҥай да поро улыт. Персонаж — Вася Кузякин, Каспий теҥыз воктеке курортыш путевко дене кая, тушто курортысо роман вуйжым аҥыртара. Но садак пӧртылеш мӧҥгыжӧ, шке ватыже да икшывыже-влак, шке йӧратымашыже да кӧгӧрченже-влак дек. Йӧратымаш нерген ик мут дене каласен мошташат ок лий. Тыгодым ала-могай шижмаш да вий пуалтыт. Автор молан кӧгӧрчен-влак дене таҥастара? Тиде кайык мужыржым огеш ондале, мужыр дене ила», — каласкалыш Роман Юрьевич.

Спектакльыште персонаж-влак киносо семын чыла нунак улыт. Икмыняр сценкым ешарен пуртымо. Марий йылмыш поэт-прозаик Геннадий Сабанцев кусарен. Музыкым композитор Григорий Архипов келыштарен. Сергей Таныгин – тӱҥ художник-оформитель. Театрын чумыр коллективше модеш, кок состав дене спектаклыьм шындат.

Москвасе М.Щепкин лӱмеш кӱшыл театр училищым тунем толшо ӱдыр-рвезе-влакат турлº рольым модыт. Тидымат палемдыман: марий группын кураторжо Россий Федерацийын сулло артистше Игорь Лях лийын. А тудо самырыкше годым лач «Любовь и голуби» фильмыште тӱҥ геройын — Лёнькан — рольжым модын. Игорь Владимировичым премьерыш пагален ӱжыныт, толеш манын ӱшанат.

У спектакльым ямдылаш, тудым сценыш лукташ жап шуко кая. Тудо эре чоным тургыжландара. Ончаш толшо эре уым ужнеже, вуча. Южо еҥ, спектакльым ала-мыняр гана сценыште шындымек, постановкын пеҥгыдын йолӱмбак шогалмыж деч вара гына ончаш толеш.

«У спектакльын илышыже кужу лиеш манын ӱшанем, тудым арам ойырен налме. Темыжат шонаш таратыше. Мый репетицийым йӧратем, тушто артист почылтеш, шинчажым ужат, южгунам прогон годым туге сайын модеш, чонеш кодеш», — умбакыже ойлыш Роман Алексеев.

Мартыште ятыр паша ончыкталтеш, сценышке угыч «Роза Розмарий» спектакль пӧртылеш. «Мужыр шӱдыр» лӱман сылне концерт лийын. Артист-влак гастроль денат лектын коштыт. Шкетан лӱмеш театрын 100 ияш лӱмгечыжым вашлияш ямдылалтыт. Паша планышт кугу. Российысе кугу олалашке гастроль дене лекташ, театр дене кылдалтше книгам, буклетым лукташ, у спектакльым шындаш…

Мо тачылан эн тӱҥ, тугай спектакльым, концертым ончыкташ тыршат. Йӧратымаш личный теме гынат, туддеч шерге илышыште нимо уке. Тиде мут дене модаш ок лий. Кажне постановко шонаш таратышаш, таче, кызыт мо илышыште ышталтеш, тудак чоным туржеш, тӱҥ верым налеш.

22-27 мартыште “Йошкар-Ола театральная” фестиваль лиеш. Тушто Ю.Байгузан пьесыж почеш шындыме «Кресӱдыр» шӱлыкан комедийым ончыктат. Икманаш, кажне ончаш толшо лишыл да шерге улыт. Чон кумылыштым куандараш, порыракым ышташ Шкетан лӱмеш театрын артистышт уло моштымашыштым пуат.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: