"Сылнылык тӱня" рубрик, 2016 ий, Ӱярня тылзын 4-ше кечыже

Йӧратымаш тудлан — илышын чеверже

Статьян авторжо Анастасия Эманова

Курчак театрыште йоча-шамычланат, кугыеҥ-влакланат спектакль ончыкталтеш. Кодшо ийын шыжым А.П.Чеховын “Три сестры” пьесыж почеш шындыме “Прозоровы. Эпитафия” спектакльын премьерже лийын. Тушто ик эн тӱҥ рольым — Маша Прозоровам – самырык артистке Надежда Медведева устан модын. Тудын героиньыже йӧратымаш деч посна ила, садлан эре шӱлыкан коштеш. Изи олаште тудлан шыгыр. Чыла тидым артистке сайын почын пуэн. Ончаш толшо-влак Н.Медведеван мастарлыкшым палемденыт, тудын модмо героиньыжым чаманеныт.

Актрисе шкежат йӧратымашым ончыл верыш шында. Маша Прозорова семынак тудлан йӧратымаш – илышын чеверже.

Надежда Медведева Волжский район Купсола селаште ныл шочшан ешыште кушкын. Кугурак икшыве лийын. Садлан изинек пашаче кушкын, шӱжар ден шольыж-влак ончылно ответственностьым шижын. “Пример лияш тыршенам. Ава ден ачамлан мӧҥгыштӧ сурт сомылкам ышташ, вольыкым ончаш полшенам. 13 ияш ушкалым лӱшташ тӱҥалынам. Авам фермыште дояркылан ыштен, тудлан полшаш коштынам”, - ойла Н.Медведева.

Тале спортсмен лийын кертеш ыле

"Бука" спектакльШколышто Надя сайын тунемын, чолгалыкшым тӱрлӧ аланыште ончыктен. Муро, почеламутым сылнын лудмо конкурслаште участвоватлен, чыла гаяк кружокыш коштын. “Купсола школышто Вячеслав Осипов музыкым туныктен. Тудак мыланем мурызо семын вияҥаш полшен. Тудо мыйым муро конкурслаш ямдылен, тыгак концерт дене районлаш коштыктен”, — шарналтыш артистке.

Артист койышан ӱдыр 11-ше класс марте куштылго атлетике дене заниматлен, ече дене коштын. Тӱрлӧ таҥасымашлаште писылыкшым ончыктен. Шуко гана призовой верым сеҥен налын. “Дипломем, грамотем-влак шуко лийыныт. Кугурак класслаште тунемме годым йолем коршташ тӱҥалын, а спортым коден кайыме шуын огыл. Ачам шкендым от чамане манын, да сырымыж дене коҥга тулыш чыла грамотем шуэн, — манеш Медведева. — Школ деч вара МарГУ-со физический культур, спорт да туризм факультетыш тунемаш пураш шоненам, но чонем театрыш ӱжын. Мыйын ковам Мария Николаевна (авамын аваже) пеш тале ӱдырамаш лийын. Тудо мыйым колхоз пашаш коштыктен, перемечым кӱэшташ, пӧртым арулыкышто кучаш туныктен. Шкеже марий тувырым чиен коштын, пайремлан эре ший аршашым чиен. Тыгай вургемже куд килограмм нелытан лийын, мешакыште киен. Нылле кок сӱаныште тӱмырым перкален. Артист койышем тудын деч куснен, шонем.

1998 ийыште, школым тунем пытарымеке, Шкетан лӱмеш Марий театрыш толынам, тушто артист лийнем манын ойленам. Мыланем тӱвыра да сымыктыш колледжыш каяш кӱлеш манын вашештеныт. Кайышым тушко. Колледжын директоржо Алексей Максимович Кленов деке пурышым. Тудо марий пӧлкаш набор уке манын ойлен. А мый творческий экзаменлан марла почеламутым, прозым тунемынам. Алексей Максимович актер мастарлыкым туныктышо Дмитрий Дмитриевич Лавров деке колтыш. Руш группыш пураш кӱчык жапыште ямдылалтым. Александр Пушкинын ик почеламутшым лудынам, Крыловын басньыже-влакым тунемынам. А вара марла муралтен-кушталтенам. Тунам Курчак театрын артистше специальность лийын огыл да драме театрын артистшылан тунемынам.

Курчак йоча гай

"Кутко сӱан"спектакльСтудент годым марлан лектынам, йочам ыштенам да академический отпускышто ик жап лийынам. Вара Олег Геннадьевич Иркабаевын курсыштыжо тунемаш тӱҥалынам. Тунамак Курчак театрыш пашаш ӱжыныт. Мый келшенам да 2002 ий годсек тушто пашам ыштем. Коллектив пеш шокшын вашлийын, пуйто мыйым шукертак паленыт, а мый — нуным.

Конешне, эн ончыч йӧсӧ лийын. Курчак дене пашам ышташ моткоч неле. Курчак тӱрлӧ уло, садлан тудын дене пашам ыштыме техникат тӱрлӧ. Мый шортынам, но пӱйым пурын манме гаяк тунемынам. А кунам паша лектышым — йоча-влакын куаныштым — ужат, чонлан ласка, творчествылан утларак кумылаҥат.

Икымше эн кугу пашамлан Самуил Маршакын “Кошкин дом” пьесыж почеш шындыме “Тили-Бом” спектакльым шотлем. Тудым РМЭ искусствын заслуженный деятельже Татьяна Батракова шынден. Ты марионеточный спектакльыште Эльвира Лисицына дене коктын модына. Коло утла курчак дене пашам ыштенна. Кажныжын образшым почын пуаш тыршенна. Тиде спектакльым 2012 ийыште Санкт-Петербургышто Деммени лӱмеш марионетке театрыште ончыктенна. Калыклан моткоч чот келшен.

Репетицийыш эре кумылын коштам. Модмо чыла ролем чонемлан лишыл да йӧратыме. Кажне курчак мыланем шерге, йоча гай. Йоча шоям вигак шижеш, курчакат тыгак. Курчак дене ик тичмаш от лий, чон почын от мод гын, курчак “нелеш налеш”: шалана, кидше але вуйжо кӱрлеш. Санкт-Петербургысо театр искусство академийысе Курчак театр факультетыште вич ий заочно тунемынам. Туныктышына Николай Петрович Наумов тыге ойла ыле: “Драматический актер Курчак театрын артистше лийын огеш керт, а курчак театрын артистше драме спектакльыште модын кертеш. Курчак – тиде айдеме”. Тудын шомакше-влакым сайын шарнем. Артист да курчак коклаште кыл лийшаш. Курчак театрыште спектакль нылле минут наре шуйна. Ты кӱчык жапыште геройын кӧргӧ шижмашыжым почын пуэн да курчаклан тудым “кусарен” моштыман. Тунам тудо илана.

Кажне модмо спектакль дене мастарлыкем нӧлтем. Чыла палем, чыла моштем манын иканат шонен омыл.

Тулар вате да Маша"Прозоровы. Эпитафия" спектакль

Ӱмаште “Кутко сӱан” марий спектакльым ончыктенна. Тушто мый кӱжгӧ йӱкан, пеҥгыде койыш-шоктышан тулар ватым модынам. Такшым шыма, лирический манме образым шагал модынам, отрицательный роль-влакым утларак ӱшанат. А сценарийым лудмо годым сай рольым тыге, осалым вес семын модам манын шонем. 

Три сестры” пьесе почеш “Прозоровы. Эпитафия” постановкышто Маша лийынам. Ты спектакльым ик эн виянлан шотлем. Тудым ик тылзыште шынденна. Режиссер-постановщик Санкт-Петербург гыч Александр Стависский лийын. Спектакльыште актер-влак уло моштымыштым, вийыштым пыштеныт”.

Надежда Медведевам вес театрышкат пашаш ӱжыныт. Тудо эсогыл Г.Константинов лӱмеш руш драме театрын сценыштыже “Кровавая свадьба” спектакльыште модын. Но Курчак театрым нимогай вес театр дене вашталташ ок шоно. “Курчак театр – юзо тӱня. Тыште пашам ышташ йӧратем. Тудо мыланем кокымшо мӧҥгӧ гаяк. Кеч-могай ешыште умылыдымаш лектеш гынат, ме ик ойыш шуаш тыршена, вашла пагалена да йӧратена”, - ойла артистке.

Н.Медведевам пелашыж ден икшывыже-влак умылат, полшен шогат, чыла гаяк спектакльышкыже коштыт. “Ныл ияш Лиза ӱдырем эреак пеленем. Тудо кажне спектакльлан, модмо ролемлан акым пуа. Ойжым шотыш налам”, — манеш тудо.

Шуко творческий еҥ гаяк Надежда Медведева пеш эмоциональный. Тудо шке шонымашыжым тура ойла. Сайла кояш тӧчышӧ, кок тӱран кӱзӧ улшо еҥым огеш йӧрате.

Чыла ӱдырамаш, поро ава гай кугу пӧртан да шуко шочшан лийнеже.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: