"Илыш йогын" рубрик, 2016 ий, Ӱярня тылзын 10-шо кечыже

Оршанке кундемыште – «Сонар биатлон»

Статьян авторжо Иван Речкин

охотник6Теве ынде шым ий почела Оршанке кундем Тошто Крешын ял воктене лӱмынак йӧнештарыме верыште республикысе сонарзе-влакын биатлон  дене таҥасымашышт эрта. Тений тудо 5 мартыште лийын.

Тушто чыла гаяк район гыч сонарзе-спортсмен команде-влак вийыштым тергеныт.

Таҥасымаш 10 шагат эрдене общий построений дене тӱҥалын. Судья  да ӱжмӧ кугу уна-влакын саламлыме шомакышт деч вара ӱмашсе таҥасымаште сеҥыше-влак — Советский районын сонарзыже-влак — Россий флагым нӧлталыныт.

охотник04Таҥасымаште кум еҥан кажне команде лопка ече дене тоя деч посна кок меҥгат пеле дистанцийым кок гана куржын да 125 миллиметр  диаметран мишеньыш 12-шо але 16-шо калибран пычал дене 25 метр кужыт гыч шогышыла лӱен. Тыге кажне команде кум этапым эртен. Ечыгорно куштылго лийын огыл. Тӧрсыр верыштат, курыкыш кӱзымӧ да волымо нелылыкат таҥасышын вийжым ситышын терген. Лачак шуаралтше, нойымым шиждыме, тыгодымак кеч-могай ситуацийыште туран лӱен моштышо спортсменым тиде лӱдыктен огыл.

охотник2Тений ончыл верым Медведево районын  спортсмен-же-влак налыныт. Кокымшо верыш «Большая медведица» лӱман команде да кумшо верыш Марий НПЗ-ын сонарзыже-влак лектыныт. Эн самырык участник «Большая медведица» команде гыч Константин Волков лийын. Тудлан 23 ий. А эн илалшыже Марий сонарзе-влак обществын 68 ияш спортсменже Иван Москвин.

Сеҥыше-влаклан шерге пӧлек-влакым кучыктеныт. Тылеч посна кажне участниклан, тиде мероприятий кужу жаплан шарнаш кодшо манын, фотокнига ямдылалтеш.

Иван Речкин.

Авторын фотожо-влак.

охотник07

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: