"Рубрик деч посна", 2016 ий, Ӱярня тылзын 4-ше кечыже

Пиал — йоча-влак пелен пашам ышташ

Статьян авторжо Марина Богданова

Школышто тунемме годымак ме чонлан келшыше профессийым ойырен налына: кӧ врач, кӧ инженер, а кӧ гын туныктышо лияш шона.  Йоча годсо шонымаш чылаштын огыл гынат, но южыштын шукталтеш. Светлана Рыжова — нунын кокла гыч иктыже. Самырык ӱдырлан школ парт коклаште шинчымыж годымак туныктышо профессий келшен.  Шочмо йылме ден литератур предметлам йӧратымыжат тудлан ты профессийым ойырен налаш таратен.

Света 1993 ий мартыште Морко район Ярансола ялыште шочын. Тыште тудын весела, модын-куржталме йоча пагытше эртен. Шинчымашым налаш шым меҥге торашке, пошкудо Шӱргыялшколышко, коштын. Света кызытат тунамсе пагытым, икымше гана школышко кайымыжым порын шарналта.ccma8kEbTeg

«Икымше туныктышем — Зинаида Александровна Емельянова. Икымше классыш тунемаш толшо 19 йочам школышко вӱденпуртымыжым тачат сайын шарнем. Тудлан кӧра тӱҥалтыш класслаште шочмо йылме да литератур деке  шӱмаҥым, а  урок деч вара мӧҥгыштӧ тӱрлӧ марий книгам лудам ыле», — ойла тудо.

А кугурак класслаште марий йылме да литератур дене тӱрлӧконкурслаште участвоватлен. 10-шо классыште тунеммыж годым марий йылме дене районысо олимпиадышке миен. Тушто 1-ше верым налын. Вара Светам Йошкар-Олаш марий литератур дене межрегиональный олимпиадыш колтеныт. Тушто ӱдыр 5 –ше вер дене палемдалтын.

Марий сылнымут деке утыр шӱмаҥын, шке гыч этюдым, ойлымашым возаш тӱҥалын. Утларакшым пӱртӱс, школилыш нерген серкален. Возымыжым Морко райгазетышке колтеден.

Школым тунемын пытарымеке, Марийкугыжанышуниверситетысе финно-угроведений институтым (кызыт Калыкле тӱвыра да тӱвыра кокласе институт)марий да йот йылме отделенийышкыже тунемаш пурен.  Студент пагытыштат чолгалык дене ойыртемалтын. Конференцийлаште докладым чӱчкыдын ыштен.

«Чебоксар олаште эртыше конференцийыште «Еш да еш кокласе кылым ончыктышо фразеологизм-влак англичан йылмыште»  темылан докладым ыштенам, тыгак шкенан университетыште научный конференцийлаште выступатленам. 5-шекурсышто тунемме годым«Финн-угор калык-влакын поянлыкышт» тӱнямбал финн-угор студенческий форумышто  участвоватленам» — ойла тудо.

2015 ийыште ӱдыр университетым тунемын пытарыш. Оршанке поселкысо школышто пашам ышташ тӱҥале. Тушто марий ден йот йылмылам туныкта. Светлана Рыжова шке пашажым йӧрата да пагала. Кажне кечын школ омсам куанен почеш. Вет йоча-влак пелен пашам ышташ моткоч кугу пиал.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: