""Кугарня" газетлан - 25 ий" рубрик, 2016 ий, Ӱярня тылзын 4-ше кечыже

Полеклыме мече спортзалыш ӱжеш

Статьян авторжо Ирина Ямбаршева

Йошкар-Олаште «Политехник» ФОК тазалыкым физкультур да спорт дене гына огыл, тӱрлӧ эмлыме курс гочат пеҥгыдемдаш полша. «Кугарня» газет редакцийыште тыршыше пашаеҥ-влаклан спорт полат Печать пӧрт воктенак верланымыж дене йӧнан. Капкылым луштараш манын, ме тушко паша деч вара кажне арнян волейболла модаш, бассейныште йӱштылаш кошташ йӧратена. Мемнам ужын, ик кечын «Политехник» ФОК-ын пашаеҥже-влак пырля волейбол дене таҥасымашым эртараш темлышт. Спортзалыште вашлиймаш веселан да пайдалын эртыш. Спорт полатын пашаеҥже-влак кумылын вашлийыч. «Политехникын» директоржо Е.Самосудов чылалан чолган модаш тыланыш, а сеҥымаш тек 8 Март пайрем вашеш ӱдырамаш-влаклан пӧлеклалтеш мане.
Судьян шӱшкалтымыж деч вара, тургыжланымашым монден, чыланат мечым эскераш тӱҥална. Ала оза семын порылыкым ончыкташ шонен, ала «погынен» шуктыдымыштлан кӧра «Политехник» команде икымше партийыште пеш вашкен модын колтыш. Кокымшо модышлан чулымлыкышт ешаралте, а вараже «Кугарня» газет редакцийын командыжым ончылташат вийышт лекте. «Шокшо» татшат шуко лие: журналист-влак гына огыл, «политеховец»-влакат кӱвар марте волышо мечым нӧлталаш шотым муыч — кажне команде тудым йоҥылыш камвозыкташ огыл манын тыршен.
Тыге тӱҥалтыште волейбол дене виянрак командым рашемдаш кум партийым модаш палемдыме ыле. Но тиддеч варат сетке воктеч нигӧн кайымыже шуын огыл. Сандене эше ик гана модаш палемдышна. Оза-влаклан партий эшеат куанлын эртыш, ончылно кайыше «Кугарня» командым нуно вашке поктен шуыч, счетым тӧрештарышт. Таҥасымаш «ничья» дене мучашлалте.
- Тыге иктешлалтме дене тыландат, мыланнат сай – келшымаш сеҥен манаш гына кодеш, — мане Е.Самосудов. – А такше таҥасымашлан ме куаненна, шке чолгалыкда дене те мемнамат таратенда – тиде сай. Спортын тӱрлӧ видше дене модаш, таҥасымашым эртараш «Политехник» ФОК-ыштына йӧнна чынжымак шагал огыл, тидым южо организаций шижын шуктен. Те модыда, воктенна улшо банк пашаеҥ-влакат толыт, чоҥышо организаций гыч коштыт да молат. Ончыкыжат тыге вашлийме шуэш. Мемнан спорт полатыште телымат, кеҥежымат капкылым шуараш йӧн уло. Кеҥеж шумеке, ошмаште пляжный волейболла модаш вучена.
Мучашлан Евгений Вениаминович мемнам пӧлек дене куандарыш: «Кугарня» газет редакций командылан чапле волейбол мечым кучыктыш. Нунылан тауштена да молыланат ойлена: тазалыкдам пеҥгыдемдаш «Политехник» ФОК-ыш коштса! А кӧ мемнан дене таҥасымашке шогалнеже гын, ме тидлан ямде улына, вет ынде у мечына уло.
Эдуард ИМАНАЕВ.
И.Речкинын фотожо-влак.

1 2

3 4

5 6

7 8

9

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: