"Сылнылык тӱня" рубрик, 2016 ий, Ӱярня тылзын 18-ше кечыже

Чер шке гыч ок чакне

Статьян авторжо Анастасия Эманова

6 апрельыште Сеҥымашын XXX идалыкше лӱмеш тӱвыра полатыште уста мурызо Светлана Осипова поро кумылым ончыктымо концертым эртара. Тушто погымо чыла окса онкологий черан еҥ-влакым эмлаш кая.

осиповаШошо у куаным, у куатым уло шӱм тич лыҥ чӱкта. Кечыйолын шӱргым ниялтымыж годым чонлан ласка лиеш, нелылык мондалтеш, юзо вийлан ӱшаныме шуэш. Неле да шучко чер дене орланыше еҥ-влак тидым поснак чот шижыт, шонем.

Рак чер нерген колат да могырлан йӱштӧ вӱдым опталмыла чучеш. Ятыр ий тиде черым эн сай специалист-влак сеҥаш тыршат. Кызыт сай оборудований да эм-влаклан кӧра ракым чактараш лиеш. Но эмлалташ шуко окса кӱлеш. Шагал еҥын тыгай шийвундыжо уло.

РМЭ-н сулло артисткыже Светлана Осипова ты проблеме дене шкежат тӱкнен. Аважын илышыжым лачак рак чер кӱрлын. Чонжо таче кечынат мӱгырен шортеш.

Тиде шучко чер дене орланыше еҥ-влаклан полшаш манын, порылыкым ончыктымо концертым эртараш шукертак шонен. Ӱмаште «Светлана Осипова-Дмитриева в кругу друзей» икымше тыгай концерт лийын. Тудым онкологий черан йоча-влаклан полшаш шонымаш дене эртарен. 200 тӱжем утла окса икшыве-влакым эмлаш колталтын.

Концерт программе оҥай да ушеш кодшо лийшаш. Иван Смирнов, Зоя Берникова, Олег Славин, Анна Османова да моло мурызо мураш тӱҥалыт. Сценыште марий, руш, татар йылмыла дене муро-влак йоҥгалтыт. Тылеч посна куштышо йоча ансамбль-влак лийыт. Карина лӱман “изи шӱдыр” яндар йӱкшӧ дене кеч-кӧмат сымыстара. Тудо ДЦП черан гынат, моткоч весела, илышым йӧратыше ӱдыр.

Ты концертлан кыртмен ямдылалтам. Пеш ответственный паша. Билет-влакым шарыман, тӱрлӧ юридический йодышым решатлыман. Концертым эртараш полшымылан республикнам вуйлатыше Леонид Маркелов, йолташ ден спонсор-влаклан таум ойлем”, — ойла артистке да поро ӱдырамаш С.Осипова.

Тыгай кугу пашам ыштен шогымыжлан Светлана Осипова кугешнымашым луктеш. Меат ӧрдыжеш кодшаш огынал. Еҥын ойгыжо кумыраш лийшаш огыл.

Толза Светлана Осипован концертышкыже!

Алевтина Шакирова

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: