"Шинчымаш кугорнышто" рубрик, 2016 ий, Ӱярня тылзын 18-ше кечыже

Чонышкышт ӱшаным пурта

Статьян авторжо Марина Богданова

АндрееваВолжский районысо Карай школышто руш йылме ден литературым туныктышо Эльвира Петровна Андреева икмыняр ий ончыч дефектолог профессийым налын.

Эльвира Петровна туныктышо тукымым шуя, манаш лиеш, вет родо-тукымжо коклаште шуко туныктышо уло. Ачаж ден аваже руш йылме ден литературым туныктеныт. Но ачаже марий да йот йылме предметламат туныктен. Кочаже (аважын ачаже), кокаже (ачажын шӱжарже) – туныктышо лийыныт.

Эҥерӱмбал ялын ӱдыржӧ Марий пединститутым тунем лектеш да Карай школышто пашам ышташ тӱҥалеш. Теве икмыняр ий ончыч Озаҥ оласе шинчымашым нӧлтымӧ институтым дефектолог специальность дене заочно тунем пытарен. Дефектологлан школышто кок ий пашам ышта.

«Кызытсе илышыште туныктышо ик специальность дене серлагышаш огыл манын шонем. Ешартыш образованийым налаш тыршыман. Школышто кок инвалид икшывына уло. Иктыже Эҥерӱмбал ял гыч коштеш гын, весыже Карай ялыштак ила. Школышко нуно арнялан кок гана толын каят», - палемда туныктышо.

Эльвира Петровнан ойлымыж почеш, нине йоча-влак тунемаш моткоч кумылан улыт. Нунын волгалтше шинчаончалтышышт гыч тидым сайын ужаш лиеш. Школышко тунемаш куанен коштыт. Занятий деч варат эсогыл  мӧҥгӧ каяш кумылышт уке.

«Нине йоча-влакым посна технологий дене туныктена. Садлан пашаште эре уым кычалаш тыршем. Шуко лудам, у материалым шымлем. Ме йырысе тӱня,  математике, марий йылме, руш йылме предметлам тунемына. Но эн тӱҥжӧ —  илышыште кӱлеш лийше сомыллан туныктена, ешартыш шинчымашым пуэна», — ойла Эльвира Петровна

Карай школышто ӱдыр-рвезе-влак нине икшыве-влак дене сайын мутланат, кӱлеш годым полшат. Йоча-влакын ойлымышт почеш, нуно моло деч тӱжем пачаш поро улыт.

Эльвира Петровна шке пашажым йӧрата. Йоча-влак деке кажне кечын школ омсам йывыртен почеш, вет тудым тунемше-влак чон йӱлен вучат. Сай шинчымашым, чон шокшыжым кажне тунемшылан пуэн шога. Поснак кок инвалид йоча-влак верч чот азаплана. Нунын психологийыштым сайын пала, кажныж дене мутланен мошта. Нине йоча-влак вуйым ынышт саке манын, чонышкышт ӱшаным пурта.

Эльвира Андрееван кок шочшыжо уло. Ӱдыржӧ ден эргыже ава чоным эре куандарен шогат. Диана Моско оласе печать университетым инженер-менеджер специальность дене тунемын пытарен, а Саша Моско олаштак автосалонышто менеджерлан пашам ышта.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: