"Ӱшанем... Вучем..." рубрик, 2016 ий, Ӱярня тылзын 18-ше кечыже

Чын йӧратымашым ужын моштыман

Статьян авторжо Татьяна Айтова

«Ӱшанем… Вучем…» ден «Ой, йӧратымаш…» лаштык-влакым лудмек, шоныдымын-вучыдымын самырык жап шарналтеш. Мыйынат ик историйым возаш кумылем лекте. Тудо иктаж самырык ӱдырлан пайдале лиеш манын шонем.

Тунам мый коло кок ияш лийынам. Пытартыш курсышто тунеммем годым почешем кок рвезе коштеш ыле. Гена – ӱҥышырак, вожылшырак, но моткоч пашаче ялысе рвезе,  а Коля изиш йоргарак, кумылзак да весела. Рвезе-влак чылт тӱрлӧ лийыныт гынат, коктынат мыланем келшеныт. Нунын кокла гыч иктыжым нигузе ойырен кертын омыл. Йолташ ӱдырем-влак Колям таҥлан кучаш темленыт. А Генан койышыж дене илышыште умбак от кай манын ойленыт.

Икана Коля кастене йыҥгыртен да уремыш лекташ ӱжын. Вара палыдыме верышке кафеш каяш темлен. Кафе ола деч коло меҥге тораште лийын. Палыдыме посёлкыш такси дене каенна. Тунам тиде мылам моткоч романтик шӱлышан темлымашла чучын. А таксист мемнам йӧршеш йоҥылыш намиен коден да кудалын. Ме иктаж кок шагат наре йӱштӧ пычкемыш урем мучко перныл коштынна, нимогай кафемат муын огынал. Почешна кугу пий кудал лектын, Коля мыйым кудалтен коден, ончыко куржын. Пиалешем, пийын озаже лектын, мыйым утарен. А рвезе мыйымак гына вурсаш пижын, пуйто муньырий улам, куржын кертын омыл…

Пычкемышалташ тӱҥалме годым изирак пу пӧртым ужынна. Романтик кафет теве могай улмаш. Кумылем моткоч чот волен,  Колят вес еҥла чучын: шыде да моткоч торжа. Кафеште Коля чотак йӱын шынден, тӱрлӧ кӱлеш-оккӱлым ойлышташ тӱҥалын. А мыйын мӧҥгеш каяш оксам кодын огыл. Мом ышташ? Чылт ӧрынам.

Тудо жапыштак кафеш йӱшӧ рвезе-влак пурен шогалыныт. Нимынярат вожылде, мый декем пижедылаш тӱҥалыныт. Коля малышыла койын шинчен. Тунам уло вӱрем шолаш пурен. Лӱдмем дене шорташ тӱҥалынам. Кафе озавате мыйым шке пӧлемышкыже наҥгаен, утарен.

Вара йолташ ӱдырем-влак деке тӱшкагудыш йыҥгыртенам, мыйым налаш толаш йодынам. Ик жап гыч Гена толын. Тудлан изи йочала куаненам. Шинчавӱд йӧре ала-мом умылтараш тӧченам. Тудо нимомат пелештен огыл, лач чот гына ӧндалын. Ты кече деч вара Гена ден Коля нерген шонымашем чылт вашталте. Тӱжвач ончымаште ӱҥышӧ рвезе неле годым шкенжым чын пӧръеҥла ончыктен.

Тидлан шагал огыл жап эртен. Гена дене ятыр ий икте-весым пагален, умылен илена, уныкана кушкеш. Пелашем дене ушнымылан ик ганат ӧкынен омыл. Тудо чын пӧръеҥ, ача, коча, илыш эҥертышем.

Садлан теве мом каласынем: илыш пелашым ойырен налме годым чот шоналтыза. Качын койышыжым уэш-пачаш шекланыза, чевер чурийвылышым огыл, чон моторлыкым кычалза. Чын йӧратымашым аклен да ужын моштыза.

Маргарита.

Волжский район.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: