"Кузе илет, ялем?" рубрик, 2016 ий, Ӱярня тылзын 18-ше кечыже

Эмлызе огыл, а библиотекарь лийын

Статьян авторжо Марина Богданова

ПорфирьеваПараньга район Олор ялысе книгагудышко лудшо-влак куанен коштыт. Тыште чыла ийготанлан келшыше книга-влакым муаш лиеш. Вет книга поро йолташ семын кажне еҥын чоныш сото тулым ылыжта, кумылым нӧлта.

Ялысе книгагудо кузерак ила? Кызыт лудшо-влак шукемыныт мо? Паша радам кузерак кая? Нине йодыш-влакым рашемдаш манын, книгагудыш пурышым. Ираида Николаевна Порфирьева тыште кеч-кӧм куанен вашлиеш, шыман мутланен колтымыжо кумылым савыра. Тудо библиотекарь сомылым 27 ий шукта. Олор ялысе книгагудыш пашам ышташ толмекыже, ты ялышкак марлан лектын.

Тудо Шернур районысо Эҥермучаш ялыште шочын-кушкын. Вара аваж дене пырля Параньга район Элпанур ялышке илаш кусненыт. 8-ше класс марте Элпанур школышто тунемын. Изинек спортым йӧратен.  Ече дене таҥасымаште эре ончыл верлам налын. Тудо медколледжыш каяш шонен, но Элпанур школ директор Кугу Пумарий школыш тунемаш каяш темлен. Школ деч вара медучилищыш тунемаш каен. Но медицинский образованийым налаш, очыни, Юмо пӱрен огыл: ала-можо чараклен. Тыге тудо медучилищыш огыл, а культпросвет училищыш библиотекарьлан тунемаш пурен:

Ираида Николаевна — шке пашажым йӧратыше, опытан пашаеҥ. Кажне лудшын кумылжым налын, сай каҥашым пуэн мошта. Лудшо-влакын йодмышт почеш нунылан келшыше книга-влакым ойырен налаш полша.

Тудын ойлымыж почеш, тышке йоча да сулен налме канышыш лекше ийготан-влак поснак коштыт. Туге гынат самырыкат, кокла ийготан еҥ-влакат пурен лектыт. Вет тушто чон кана, уто шонымаш ӧрдыжкӧ кораҥеш, а эн тӱҥжӧ — лудаш кумыл лектеш.

Чылаже тыште 5000 книга уло. Йоча-влаклан посна лудмо залым йӧнештарыме. Нуно урок деч вара мӧҥгышт кайышыла пурен лектыт але кас велеш толыт. Чонлан келшыше книгам ойырен налын, волгыдо залыште лудыт. Пырдыжыште тысе поэт-влакын портретыштым вераҥдыман стенд уло. Кажне авторын фотографий йымалне кӱчыкын илыш корныжым серыме. Олор калык шке мутмастарже-влак дене кугешна.

Ираида Николаевна тӱрлӧ пайрем вашеш тӱвыра пӧртын пашаеҥже-влак дене пырля йоча-влаклан оҥай мероприятийым эртара. Тений книгагудо пелен сулен налме канышыш лекше ийготан-влак «Чинчывий» клубым чумыреныт, арняш ик гана погынат. Ӱстел йыр шинчен, тӱрлӧ темым тарватат, икте-весе нерген каҥашат, шке шонымыштым почын пуат.

«Клубым сулен налме канышыш лекше туныктышо Раисия Кузьминична Золотарева вуйлата. Ик занятийыште муро нерген мутланышт гын, вес занятийым тукымвож теме дене кылдышт. Кызыт вашлиймаш оҥайын эрта. Еҥ-влак икте-весыштым сайын палат, ялысе тӱрлӧ мероприятийым эртараш полшат», — ойла тудо.

Кумылан еҥже книгагудыш толаш жапым кеч-кунамат муэш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: