"Шинчымаш кугорнышто" рубрик, 2016 ий, Ӱярня тылзын 18-ше кечыже

Яна дене школ кугешна

Статьян авторжо Марина Богданова

3VTem0LYAtQ Медведево районысо Руш Кукмарий школышто 9-ше классыште тунемше Яна Пушкина школын чапшым нӧлта, манаш лиеш. Марий кугыжаныш йылме дене олимпиадыште кодшо ийын районышто, а тений республикыште икымше верым налын.

Яна ты ялыштак шочын-кушкын. Ача-аваже, коча-коваже марий улыт. Ешыште чыланат шочмо йылме дене мутланат. Школыштат руш йоча-влак коклаште тудо марла вожылде ойла.

Шочмо йылме Яналан нимо деч шерге. Марий йылмым тудо йӧрата, шке калыкше дене кугешна. Марий йылмым школышто тунемме дене гына огеш серлаге, ешартыш шинчымашым налаш тырша, у материалым кычалеш. Олимпадыште сеҥымыже ӱдырын шочмо йылмым сайын палымыжым ончыкта.

Тудо почеламутым сылнын лудын мошта. Кодшо ийын районышто сар темылан пӧлеклалтше почеламутлам лудмо конкурсышто 2-шо верым сеҥен налын.

Ӱдыр музыкальный школышто тунемеш, спорт дене кылдалтше тӱрлӧ кружоклашке коштеш. Тений музыкальный школым тунем пытара, дипломым налшаш. Волейбол, баскетбол дене модеш.

Икманаш, ӱдыр чыла вере шуаш тырша. Школышто сайын тунемеш да тӱрлӧ аланыште шке мастарлыкшым ончыкта. Пӱсӧ уш-акылан, чолга улмыж дене моло тунемше деч ойыртемалтеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: