"Улам мый Рве-зы-лык!" рубрик, 2016 ий, Вӱдшор тылзын 8-ше кечыже

Артистке лийын кертеш ыле

Статьян авторжо Анастасия Эманова

Морко район Кораксола ялын шочшыжо Анастасия Васильева МарГУ-со Калык культур да тӱвыра кокласе кыл институтышто кокымшо курсышто тунемеш. Ӱдыр университетын тӱвыра илышыштыже чолгалыкшым эреак ончыкта, тыгак почеламутым возкала.

Анастасия ВасильеваНастя тӱҥалтыш класслам Шӱргыял кыдалаш школышто (кызыт тӱҥ школ) тунемын, вара – Морко посёлкысо 1-ше №-ан школышто. “Изирак класслаште тунемме годым тӱрлӧ лудмаш конкурсышто участвоватленам. А Моркыш тунемаш толмеке, республикысе тӱрлӧ фестивальыште мастарлыкем ончыктенам. Тыгак марий йылме да литератур дене олимпиадыште районыштат, республикыштат участвоватленам. Марий йылме дене олимпиадылан София Васильевна Никитина ямдылен. Тудак мемнан класс вуйлатыше лийын.

Тылеч посна руш литератур, историй да обществознаний дене олимпиадылаште лийынам.

Индешымше класс гыч Морко образцовый театрыште модынам. Спектакль-влакым тӱрлӧ районлаште ончыктенна. Тыгак гастроль дене Пошкырт кундемыште лийынна. Тушто “Теве тыланет тулаче” спектакльым ончыктенна. Мый школышто тунемше Верук лӱман ӱдырым модынам. Тиде спектакльым 2013 ийыште республикысе драматический коллектив-влакын “Каскад” фестиваль-лабораторийыштышт ончыктенна. Тушто мыйым “Кокымшо планан эн сай роль” номинацийыште диплом дене палемденыт. Морко театрын лӱмгечыжлан пӧлеклалтше концертыште «За успехи в работе театра» дипломым кучыктеныт. Чыла диплом да грамот-влакым да школышто сайын тунеммым шотыш налын, 2013 ийыште Морко район администраций вуйлатышын грантшым пуэныт. Тыгай сеҥымашыш сай да уста туныктышем-влаклан кӧра шуынам. Поснак кугу таум София Васильевналан да театрым вуйлатыше Анна Васильевна Якушевалан ойлынем.

Почеламут конкурслашке кумылын ушнем. Марий поэт-влак кокла гыч Валентин Колумб да Зоя Дудинан творчествышт келшат. Нунын мурсаскашт шонаш таратыше, кумылым нӧлтышӧ улыт. Шкемын возымо ныл почеламутем уло. Нуно «Кутко еш» журналыште савыкталтыныт. 2011 ийыште ме тиде журналым моло районласе йоча-влак дене погынен, пашам ыштен луктынна.

Шочмо йылмем моткоч йӧратем, сандене школ деч вара МарГУ-шко марий йылме ден литературым да англичан йылмым туныктышо специальностьлан тунемаш пуренам. Тыгак Сыктывкар олаште финн йылмым тунемме курсым эртыме нерген сертификатем уло.

Чолгалыкем университетын тӱвыра, мер илышыштыже ончыкташ тыршем. “Голос Юности”, “Студенческая весна” мероприятийлаште, конференцийлаште, тӱрлӧ лудмаште участвоватлем. МарГУ пелен почылтшо проектирований школыш коштам. Калык культур да тӱвыра кокласе кыл институтышто эртаралтше мероприятий-влакым ямдылаш полшем. Студент самоуправленийын членже улам. Шукерте огыл Йошкар-Олаште илыше марий-влакын погынымашышт эртен. Марий калык погынышко каяш делегатыш кандидат лийынам, но йӱкым шагалрак погенам.

28 март гыч 4 апрель марте Карелийыште лийынам. Тушто «Финн-Угрий студенчествын миссше” конкурс эртен. Марий Элын чапшым Анастасия Ямбаршева арален. Мый тудлан марий калыкын «Суртыш у еҥ толмо» йӱлам модын ончыкташ полшенам.

Вес кундемым ужын кошташ, калык, тудын тӱвыраже, традицийже дене палыме лияш моткоч оҥай. Карелий келшен. Ойыртемалтше пӱртӱс, поро кумылан да пашам йӧратыше калык сай шарнымашым коденыт. Карелийыште моткоч шуко марий-влак илат. Тиде куандара”, — манеш студентке.

Настя — ешыштыже икымше йоча, садлан шольо-шӱжарже-влаклан сай пример лийнеже. “Мыйым ончен, шкештат пашам ышташ, творчествылан кумылаҥышт шонем. Авамат мый денем кугешныже манын, чот тыршем. Ешыштына вич икшыве улына. Вашла йӧратена, умылен, пагален илена. Еш – мемнан поянлыкна, илыш вийна. Авана мемнам шкетын ончен кушта. Тудо мыланна эн лишыл йолташна. Студентше годым Валерий Алексеевич Якушевын вуйлатыме «Рвезылык» ансамбльыште куштен. Кызыт ялысе клубын эртарыме концертлаштыже мура, кушта. Кугурак шӱжарем Морко поселкысо икымше номеран школышто луымшо классыште тунемеш. Вес шӱжарем творческий шӱлышан. Икымше класс гычак (кызыт кумшо классыште тунемеш) сценыште выступатла. Тудо Морко поселкысо йоча сымыктыш школышто, хореографий пӧлкаште тунемеш, тыгак сольфеджио урокыш коштеш. Концертлаште чӱчкыдын выступатла. Ынде ик ий Анна Васильевнан вуйлатыме йоча театрыште модеш. Школышто кажне гаяк мероприятийыште да конкурсышто участвоватла. Театрыш коштшо моло артист-влак дене пырля кодшо арнян “Воштылаш, товатат, сулык огыл” мыскара фестивальыште участвоватлен. Икымше верым налыныт. Умбакыжым шӱжаремын виолончель дене шокташ тунемаш кумылжо уло.

Ик шольым тӱҥалтыш класслаште тунемеш, тудо сӱретлаш йӧрата. Весыже йочасадыш коштеш”, - ойла А.Васильева.

Настя аважлан, шӱжар-шольыжо-влаклан пеҥгыде эҥертыш лийнеже, тӱням ужнеже, пашаж дене йоча-влаклан куаным кондынеже.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: