"Сылнылык тӱня" рубрик, 2016 ий, Вӱдшор тылзын 14-ше кечыже

Калыкнан шӱмжӧ — Марий театр

Статьян авторжо Татьяна Иванова

Михаил МатвеевМарий калыкын Юмын шӱлышым, поро вийым пуышо да кугешныме кумылым шочыктышо ик эн данле полатше – М.Шкетан лӱмеш Марий театрже — уло. Кажне гана лач ты тӧнежыште лӱмлӧ пайрем, усталык кас, фестиваль да моло мероприятий-влак лийыт. Марий калыкын Х погынжо лач ты чапле полатыште эрта.
Ӱмаште Марий театрым Михаил Иванович Матвеев (снимкыште) вуйлаташ тӱҥалын. Тудын пашам ыштыме жапыште икмыняр у ошкыл ышталтын. Таче театрыште 40 актер тырша, кажныжын рольжо лийже, паша деч посна ынже шинче манын, режиссер, администратор-влак кыртмен тыршат. Илыш ончыко кая, садлан саманлан келшыше спектакльлам ямдылаш да еҥ-влакым театр дек кумылаҥдаш кӱлеш.
“Ӱмаште 96-шо тургымым 8 октябрьыште драматург Сергей Николаевын “Салика” пьесыж почеш шындыме спектакль дене почынна. Москосо Щепкин лӱмеш театр институтым тунем лекше ӱдыр-рвезе-влакым вашлийна, нуно у тургымыш ушнышт. Самырык артист-влаклан Марий Эл правительстве могырым полыш лийын, тений нунылан социальный проект почеш у пачерым пуымо. Кугу таум Марий Эл Республикым вуйлатыше Леонид Маркеловлан да поснак тӱвыра министр Михаил Васютинлан каласена. Илыме вер уло гын, пашам ышташ кумыл утыр лектеш, тӱҥжӧ – артистым пагалымаш да ӱшаным пуышо тукымым аклымаш палдырнат шонем”, — ойлыш Михаил Матвеев.
Чынак, ик кугу ешыште кум тукым – илалшырак, вийвал да самырык вий — тыршыме дене театрын куатше ешаралтын. У деч у спектакль, концерт, бенефис-влак калык чоным куандарат, шортарат, шонаш таратат.
Режиссер-влак Роман Алексеев ден Василий Домрачев, уло моштымашыштым, усталыкыштым пыштен, у спектакль-влакым шындат. Кажне актер мастарлыкше дене ойыртемалтеш.
“Марий Эл Республикысе тӱвыра, печать да национальность паша шотышто министерстве ден Шкетан лӱмеш Марий театр эн сай пьесым возышо-влак коклаште VII конкурсым увертареныт, тудын лектышыжым 28 апрельыште театрын сценыштыже иктешлена. Сеҥыше-влакым палемдена да нуным саламлаш тӱҥалына. Ты конкурсыш 18 паша пурен. Конкурсын задачыже тыгай лийын: талантан авторым кычалаш, муаш, олыкмарий да курыкмарий йылмыла дене возымо произведенийлам театр-влакын репертуарышкышт пурташ. Сай пьесе-влакым М.Шкетан лӱмеш Марий театрын, Самырык театрын да Курыкмарий театрын сценыштышт ончыктена. Сеҥыше радамыш логалдыме, но жаплан келшен толшо моло сай пашамат театрлан ончалаш темлена”, — умбакыже палдарыш Михаил Иванович.
Театр 2019 ийыште 100 ийым тема. Тиде кече вашеш кызытак шуко сомыл ышталтеш. Тӱрлӧ фестивальыш лектын коштыт, конкурсышто усталыкыштым ончыктат, моло регионласе театр-влак дене кылым пеҥгыдемдат, икманаш, паша шуко да тӱвыргӧ.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: