"Сылнылык тӱня" рубрик, 2016 ий, Вӱдшор тылзын 29-ше кечыже

«Каскад» у лӱм-влакым почын

Статьян авторжо Анастасия Эманова

21-23 апрельыште Йошкар-Олаште республикысе драматический коллектив-влакын “Каскад” фестиваль-лабораторийышт эртен. Тушко тений Киров ола да Пошкырт кундем Мишкан район гыч коллектив-влакат толыныт.

Фестиваль годым чылаже лу спектакль ончыкталтын. Нунын коклаште кум марла спектакль лийын: “Агытан Микал” (Морко калык театр), “Ава шӱм” (Кужэҥер “Воштончыш” калык драматический коллектив) да “Йоргасола каче-влак” (Мишкан тӱвыра пӧрт пеленысе “У илыш” калык театр).

Кажне спектакль шкешотан да шонаш таратыше лийын. Мутлан, Н.Лузгинов лӱмеш Оршанкысе руш калык драмтеатр А.Гордеевын “На том стоим” произведенийже негызеш спектакльым ончыктен. Кугу Отечественный сар нерген постановкым ончаш эреак оҥай да вургыжтарыше. Театрын артистше-влак чот тыршеныт, южгунам утыжденат модыныт, манаш лиеш, но зал ты спектакльым сайын вашлийын, южыштын шинчавӱдыштат лектын. Критик-влак спектакль самырык-влакым порылыклан, лӱддымылыклан да шочмо элым йӧраташ туныкта манын палемденыт, тыгодым икмыняр ситыдымашымат ойленыт. “Актер-влак пеш шуко кычкырен ойлат. Пьесым кӱчыкемдыме, садлан жанрым умылен шуктен омыл. Но тиде инсценировкышто тӱҥ шонымашым раш почын пуымо: кызытсе саманыште айдемын илышыже “шулдештын”. Ожно еҥ-влак утларак поро, умылышо лийыныт. Самырык-влак кугезе коча-коваже-влакын подвигыштым шарнен илышаш да нуным лӱмнерыштым волтышаш огытыл. Спектакльыште кок тукым гоч тидым сайын почын пуымо”, — ойла жюри член, театральный критик Д.Д.Лавров.

Морко калык театрын “Агытан Микал” спектакльжым шукын ончаш толыныт. Комедий калыкын кумылжым савырен. Жюриат тудым кӱкшын аклен. Событий совет жапыште кая, а герой-влакын тувырышт кызытсе саманлан келшыше. Событийым кызытсе жапыш кусарыман але вургемым, икмыняр фактым (мутлан, ожно ушкал 50 тӱжем теҥге шоген огыл) чынракым, келшышым ыштыман, — темлен жюри.

“Каскад” фестиваль-лабораторийыште Гран-прим “Ящерица” спектакльже дене Йошкар-Оласе “В старом доме” калык театр-студий сеҥен налын.

“Калык самодеятельный коллектив-влак” номинацийыште 1-ше степенян Медведево тӱвыра да каныме рӱдер пеленысе “Маска” калык ТЮЗ, 2-шо степенян Звениговысо “Провинциалы” да Мишканысе “У илыш” калык театр-влак, 3-шо степенян Кужэҥер “Воштончыш” драматический коллектив, Морко калык театр да Н.Лузгинов лӱмеш Оршанкысе руш калык драмтеатр лауреат-влак лийыныт.

“Драматический, музыкально-драматический коллектив-влак” номинацийыште 2-ше стпенян лауреат лӱмым МарГУ-со студент-влакын театрышт налын, 3-шо степенян лауреат У Торъял районысо тӱвыра да каныме рӱдерын “Дамки” театр студийже лийын.

“Сылнымут наследийыш ушнымылан” дипломым Киров оласе А.Грин лӱмеш библиотекын “Зурбаган” книга театрлан кучыктымо, “Эн сай сценографий” номинацийыште Л.Иванова (“Провинциалы” театр) палемдалтын, “Эн сай костюм” номинацийыште – О.Ложкина (“В старом доме” театр), “Эн сай музыкальный оформлений” номинацийыште — Кужэҥер “Воштончыш” драматический коллектив.

“Эн сай ӱдырамаш роль” номинацийыште “Ящерица” спектакльыште тӱҥ героиньым модшо О.Пектеева (“В старом доме” театр-студий”) сеҥен, “Кокымшо планан эн сай ӱдырамаш роль” номинацийыште — “Ава шӱм” спектакльыште Матрам модшо Л.Чапаева (“Воштончыш” коллектив) да “Вечер с Аркадием Аверченко” спектакльыште Валям модшо К.Загарских (“Зурбаган” книга театр).

“Кокымшо планан эн сай пӧръеҥ роль” номинацийыште “Йоргасола каче-влак” спектакльыште Ялкайым модшо Р.Плотников ден Сакарым модшо А.Ибулаев (“У илыш” театр) сеҥеныт.

Жюри “Эн сай актер ансамбльлан” “Зурбаган” книга театрын артистше-влакым шотлен.

Тылеч посна тӱрлӧ рольым сайын модмылан икмыняр дипломым кучыктымо.

Кужэҥер районысо «Воштончыш” драмколлектив 2007 ийыште шочын. Театрыш эн ончыч шагал участник коштын. Коллективыштына пӧръеҥ лийын огыл, садлан южо артистке ик спектакльыштак ӱдырамашымат, пӧръеҥ рольымат модын. “Театрын ик эн уста артисткыже – Зинаида Алексеева. Тудо коллективышкына ик эн первый ушнен. 65 ияш гынат кеч-могай рольым ялысе марийымат, банкирымат, кызытсе саманысе ӱдырамашымат – модын кертеш. Теве шукерте огыл Валерий Григорьевын пьесыж почеш шындыме «Ава шӱм» драмыште Зинаида Алексеева Онисан рольжым моткоч мастарын модын. Тиде драме дене ме «Каскад» фестиваль-лабораторийыште кумшо степенян диплом дене палемдалтынна. А Зинаида Алесеевалан Онисан рольым сайын модмыжлан специальный дипломым кучыктеныт.

«Воштончыш» драмколлективыш Римма Ахманова, Ольга Сергеева, Вероника Чиркова, Елизавета Петухова (70 ийым эртен) куанен коштыт. Тыгак Эльвира Егорова, Лариса Аблинова, Галина Алембаева, Эльвира Иванова, Галина ден Виктор Сидыгановмыт ушненыт.

Кажне ийын тӱрлӧ спектакльым шындена. Репертуарна поян: “Кузе илет, ялем?”, “Пупкин ӱдырым налеш”, “Яжар пыжаш”, “Сӧсна поминка” комедий-влак, “Молан тольым?” да молат. 2014 ийыште Геннадий Гордеевын пьесыж почеш шындыме “Шӱшпык муро, умыр кас” спектакль дене Кужэҥер да пошкудо районысо яллашке лектын коштынна. Калык чыла вереат порын вашлийын.

Паша лектышна сай. Ӱмаште “Воштончыш” драматический коллективлан калык лӱмым пуэныт”, - ойла вуйлатыше Людмила Чапаева.

Фестивальын участницыже, “Зурбаган” книга театрын самырык артисткыже Ксения Загарских театрыш кок тылзе ончыч толын. “Вечер с Аркадием Аверченко” спектакльыште тудо Валя лӱман ӱдырым модын. Жюри артисткын пашажым кӱкшын аклен. А вет Ксения тиде рольым вес артистке олмеш модын, кӱчык жапыште ямдылалтын.

Артистке Киров оласе 40-ше №-ан школышто 11-ше классыште тунемеш. Тудо тыгак 4-ше №-ан музыкальный школым “полное эстетическое образование” специальностьлан тунем пытарен. “Музыкальный школыш коштмо годым театр предмет лийын. А кок тылзе ончыч палымем йоча библиотеке пеленысе “Зурбаган” книга театрыш ӱжын. Мый кумылын келшенам. Театр мыйым изинек сымыстарен. Спектакльыште шкендым ончыкташ, образым тичмашын почын пуаш тыршет. Тиде моткоч оҥай паша,” — ойла ӱдыр.

Ксения Вятский кугыжаныш гуманитарный университетыш психологлан тунемаш пурынеже. Тидлан кызыт кыртмен ямдылалтеш. Тыгодым театрын кажне репетицийышкыже кошташ тырша.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: