"Корнывожышто вашлиймаш" рубрик, 2016 ий, Вӱдшор тылзын 29-ше кечыже

Кидмастар да гармоньчо Ольош

Статьян авторжо Татьяна Иванова

Кидмастар-влак дене палыме лиймек, ала-молан чонем чот куана. Пашаштым ончен, порын кугешнем, кузе тидым чыла ыштен моштат, кушто жапым муыт да моло йодыш иканаште лектыт.

Теве Алексей Борисов кумыж гыч тӱрлӧ арверым, атым ышта, эше уста гармонист.

Тудо Морко район Памашсола Вончӱмбал ялыште 1975 ий кеҥежым шочын. Кыдалаш шинчымашым Эҥерсола школышто налын.

Гармоньым шоктымыжым пален налмеке, йодышем лекте: “Кӧ туныктен?” Алексей Александрович тыге мане: “Изинек гармоньым йӧратенам, гармонь йӱкым колам веле, гармоньчо воктенат лиям. Эре онченам: кузе тудым шоктыман. Кокымшо классыш вончымекем, авам гармоньым налын пуэн. Тыге шке семынем шокташ тунемым”.

Кугурак лиймекше, Алексейым Эҥерсола клубын тунамсе вуйлатышыже Пётр Павлович Эчейкин ансамбльышкыже ӱжын. Тушто рвезын мастарлыкше утларак вияҥын. Тӱрлӧ вере концерт дене коштыныт. 11-ше классым тунем пытарымек, Алексей Борисовым клубышко пашаш налыныт, Кӱчык Эҥер клубыш художественный вуйлатышылан шогалтеныт. Морко тӱвыра пӧрт Борисовлан Йошкар-Олашке культпросветучилищыш заочно тунемаш каяш направленийым пуэн, но ты ийынак ты пӧлка петырнен, садлан толын огыл. Вара тӱрлӧ амаллан кӧра могай-гынат чарак лектын. Тыге музык образованийым налын огыл. Туге гынат чонжо усталык дене вӱдылалтын. 2001 ийлаште пу, кумыж гыч тӱрлӧ арверым ышташ кумылжо лектын, столярлан тунемын. “Кумыж гыч тӱрлӧ ате-шамычым: тӱйысым, кружкам, соломкым ыштылам. Но тидын деч ончычак кузе кумыж ате-шамыч ышталтыт, ончен коштынам. Пиалешем, шкенан вел ик марий могай жапыште кумыжым кушкедаш, кузе тудым аралаш, кузе чын кучылташ туныктен. Тыгак могай ӱзгар-влак кӱлыт, могайрак кумыж гыч сылне да оҥай атым ышташ лиеш, ойлен”, — каласкала Алексей. Тыге эркын-эркын кӱлеш ӱзгарым поген, кидпашалан пижын. Ушыштыжо иктаж-могай сылне сӱрет волгалт кая гын, кумыжыш кусара. Шуко ате шочын, йолташ, родо-влаклан пӧлек шотеш пуэн, ужаленат. Тудо пагытыште, очыни, кумыж гыч арвер шагал ышталтын, садлан Алексей деч пашажым йодшо-влак ятырак лийыныт. Финн-угор тӱшкаш пурышо еҥ-влак йодмашым колтеныт, кумыж ате-влакым налыныт.

Алексейын кидпашаже-влак Морко тӱвыра пӧрт пелен “Усталык пӧрт” выставке залыште аралалтыныт. А 2013 ийыште тудо Провой вел Мочалище посёлкыш илаш куснен. Тудын усталыкше нерген тыштат пален налыныт. Тысе тӱвыра пӧртыштӧ выставкыже лийын, вара пашашке налыныт. Алексей Александрович ты тӱвыра полатын аккомпаниаторжо, ансамбльым поген. Владик ден Максим эргыже-влак кушкыт. Пелашыже Эльвира Леонидовна кевытыште ужалышылан пашам ышта. Ваш-ваш полшен, эҥертен илат.

Алексей — поро да пашаче марий пӧръеҥ. Тудын йырже йоча-влак погынат, мураш-кушташ тунемыт, кидпашан кузе ышталтмыжым пален налыт.

Теве тыгайрак ик кидмастарын пӱрымашыже да пӱртӱс лоҥгаште мумо пиалже.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: