""Кугарня" газетлан - 25 ий" рубрик, 2016 ий, Вӱдшор тылзын 7-ше кечыже

“Кугарня” газет дене пырля “Воштылаш, товатат, сулык огыл!”

Статьян авторжо Татьяна Иванова

Илышна неле манын, вуйым савен шинчыман огыл. Кумылым, мутлан сылне муро, поро паша, мыскара кас нӧлталыт. Чӱчкыдын калыкыш лектат гын, шканет мом-гынат уым муат. Теве 1 апрельыште “Кугарня” газет редакций черетан “Воштылаш, товатат, сулык огыл!” мыскара фестиваль-конкурсым эртарыш. Йошкар-Оласе В.Ленин лӱмеш тӱвыра полатыште ты кечын ик яра верат лийын огыл, тугеже 800 утла еҥ весела вийым пуышо “эмым” налын. Кажныже, очыни, воштылын, шыргыжын, муралтен да илышын уто-ситым ужын, шкаланже могай-гынат иктешлымашым ыштен.
Фестивальыште 17 номер ончыкталтын. Тыште монологым лудшо да сценкылам ончыктышо участник-влак лийыныт. Кугу сценышке сай номерым лукташ манын, районлаште отборочный турым эртаренна. Фесивальыш толшо мыскараче-влакын номерыштым режиссер-влак О.Иркабаев ден В.Григорьев ончен лектыныт, ой-каҥашым пуэныт. Но ала-молан южо участник, сценышке лекмек, садак шке семынже утым “куктыштын”, кужун кучалтын. Тыге оҥайлык йомеш, мыскаражат ончаш толшым сырыкта веле, шонем. Вес гана тыге ынже лий манын, ончылгоч ушештарена: вич-шым минут деч кужун шуйнышо сценкым программыш огына пурто. Тыйын мыскарат спектакльыш савырна гын, действийын писылыкше да оҥай шонымашыже йомыт. Умылена, кажнын мыскараже шкаланже эн оҥайла да чаплыла чучеш. Но тыгодым ончаш толшым савырен моштыман, организатор-влакын йодмашыштымат шотыш налман. Ты гана ятыр у лӱм лектын, у коллектив толын.
Содыки ме мыскара жанрым арален кодаш манын пашам ыштена, тидлан вий-куатым, жапым ойырена. Уста да кӱын шушо мыскарачым куштена. Ты проектнам ончыкшымат илышыш пуртена да “шкенан” номерна-влаклан вуйын шогаш тӱҥалына. Кажне участниклан кугу таум каласена.
Икымше верым да окса премийым Параньга районысо Усола клуб “Кызыт илыш тыгае” (авторжо Светлана Ларионова) ден Моркысо йоча образцовый театр “Чыла “К” буква гыч” (авторжо Анна Якушева) сценкышт дене налыныт. Кокымшо верым “Марий подкогыльо” командылан пуымо, “Амарис” фирмын сертификатшым кучыктымо. Кумшо верышке Морко район Тыгыде Морко клубысо драмкружокын участникше Р.Александрова ден Э.Крижановский “Вӱльӧ Ӧрчӧмӧ” мыскарашт дене лектыныт. Нунылан “Лед и пламень” фирме деч пароварке логалын. Тыгак “Марий Эл” газет ден “Сайвер” ателье пӧлекым пуэныт. Кажне участник кумылаҥдыше приз дене палемдалтын. Касым мыскараче-влак Валентина Ефремова ден Вера Мочаева устан вӱденыт.
Жюри пашам ыштыме жапыште Морко гыч “Рвезылык” ансамбль, Параньга район Усола гыч “Мурпеледыш”, Советский поселко гыч “Кугезе кумыл”, Звенигово районысо Кужмара гыч “Воштончыш” куштышо да фольклор ансамбль-влак, Волжский районысо Карай клуб ден Морко районысо Тыгыде Морко тӱвыра да каныме клуб-влакын пашаеҥышт сӧрастареныт.
Йолташ-влак, воштылаш, товатат, сулык огыл. Илышлан куанен илыза да логалше чыла нелылыкым сеҥаш тыршыза.

01 02

03 04

05 06

07 08

09 1

001 002 003

004 005 007

008 009

2 3

4 5

6 7 12

8 9

13 14

15 11 18

17 23 19

20 21

22 24

26 27

28 29

30 31

32 33

34 25

37 38

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: