"Рубрик деч посна", 2016 ий, Вӱдшор тылзын 25-ше кечыже

Кумшо вере тунемеш

Статьян авторжо Эльвира Терентьева

Анна Мишина ден В.Семенова

Марла йытыран кутырен моштышо Анна Мишина дене Марий калыкын погыныштыжо палыме лийым. Тудо Эстоний гыч эскерыше Валентина Семёнова дене пырля шке кумылын толын ыле. Кызыт Аннуш (тудым музыковед О.Герасимов тыге лӱмденат, шкенжым таче тыге манеш) Эстонийыште ила да Тартусо университетыште “Этнологий” специальность дене тунемеш.

Каласыман: ӱдыр Магадан областьыште шочын да куд ияш марте ик марий шомакымат пален огыл. Вара ешышт дене Пермь кундемыш кусненыт. Аннушын йоча жапше Суксун район Эҥермучаш ялыште эртен. Ты жаплан композитор Ю.С.Евдокимов ялышке пӧртылын да Суксунысо Йоча сымыктыш школын филиалжым почын. Икымше выпуск радамышке Аннушат логалын.

Корныжо Йошкар-Олашке шуйнен. И.С.Палантай лӱмеш республикысе тӱвыра да сымыктыш колледжыште мураш тунемын (2002-2006). Вокал дене туныктышыжо — “Эреҥер” ансамбльым вуйлатыше С.Чернова. Вара Чебоксарысе И.Я.Яковлев лӱмеш кугыжаныш педагогика университетын музыкально-педагогический факультетшым тунем пытарен. Музыкым туныктышо лияш шинчымашым погымо дене пырля “Фольклор” специализацийым налшаш верч чуваш мурым мураш ныл ий тунемын. Тылеч вара Пошкырт кундем Пӱрӧ район Чишма школышто музыкым кок ий туныктен.

Кызыт “Марий калык коклаште евангелий черкын шарлымыже” теме дене диссертацийым воза. Аннуш лютеран черкыш коштеш, сандене ты теме тудлан лишыл. Кажне ийын октябрьыште Финн-угор кече-влак эртыме годым Анна мура, шиялтышым шокта. Тӱҥ шотышто эрвелмарий калык мурым йӧрата.

Тартусо марий-влак” организацийлан 23 апрельыште 10 ий темеш. Ты кечын Тартушто лӱмгечылан да Марий талешке кечылан пӧлеклалтше кугу пайрем лиеш. Анна – ты организацийын правлений членже. Ты пайремыш шуко марий еҥым вучат.

Эльвира Терентьева.

Комментарий-влак:

Комментарийым ешараш:

Войти с помощью: