"Рубрик деч посна", 2016 ий, Вӱдшор тылзын 19-ше кечыже

КУМШО ВЕР ДЕНЕ!

Статьян авторжо Эльвира Терентьева

Татарстан Республикыште марий-влак ий гыч ийыш шагалемыт манаш ок лий. Теве 1989 ийысе перепись почеш ты кундемыште 19446 еҥ марий улам манын пеҥгыдемден каласен гын, 2002 ийыште – 18787 еҥ, а 2010 ийыште – тылеч шукыракын – 18848 еҥ! Лектеш: марий-влак пошкудо кундемыште ешаралтыныт гына. Весат куандара: марий ача-аван ӱдыр-эргышт шочмо йылмым тунемыт. Тидлан кугыжаныш могырымат сай полышым пуат, тӱрлӧ конкурсым эртарат.

print_1119867_1392951

Теве тений идалык тӱҥалтыште Татарстан Республикысе образований да науко министерстве шочмо йылме ден литературым туныктышо-влаклан мастер-классым эртарыме шотышто “Туган тел” всероссийский конкурсым увертарен ыле. Тудо «2014-2020 ийлаште Татарстаныште республикысе кугыжаныш да моло йылме-влакым арален кодымаш, тунеммаш да вияҥдымаш” кугыжаныш программе почеш эртаралтын.

“Туган тел” конкурсышто участвоватлаш Российыште илыше, татар йылме ден литературым туныктышо-влакым ӱжыныт. Конкурс кум этап дене эртен: муниципальный, заочный да заключительный. Тушто Российын 15 регионжо гыч шӱдӧ утла туныктышо шке мастарлыкшым терген. Финалышке руш, татар, чуваш, удмурт, марий, мордва да иврит йылме-влаклан кумылаҥдыше 34 педагог лектын. Мастер-класс-влакын очный туржо Озаҥыште 24-25 мартыште лийын.

Конкурсыш марий йылмым туныктышо-влакат ушненыт, а финалышке коктын логалыныт: Арск районысо Шорамучаш школ гыч гыч О.И.Антипова ден Менделеевск район Элнет школ Т.Н.Абрамова. Каласыман: пошкудо республикысе школлаште марий йылмым шочмо йылме семын тунемыт. Тыгак кыдалаш да кугурак класслаште тунемше ӱдыр-рвезе-влакланат марий сылнымутын классикше-влакын произведенийышт дене уроклаште палыме лияш йӧн ышталтын.

Конкурс годым туныктышо-влак тӱрлӧ тергымашым эртеныт. Тыге Гран-прим Озаҥысе 39-ше №-ан школышто татар йылмым туныктышо Суюмбика Салиховалан кучыктеныт. Сеҥыше-влак радамыште марий туныктышат уло: Олеся Антипова III верыш лектын. Тудо конкурс нерген тыгерак каласыш:

- Мый тиде конкурс гоч виемым терген ончышым. Тылеч вара марий йылмым туныкташ эшеат кугу кумыл шочо. Конкурсын положенийже почеш урокын фрагментшым ончыктыман ыле. Тидлан 5-ше классым ойырен налынам. Сочиненийым возымаште йоча-влак нелылыкым шижыт, садлан ик йӧным кучылташ темлышым. Йылме лывыртыме пашам эртарыме годым икшыве-шамычын шонымашыштым гармонь форман кагазеш возыктышым. Икте-весын мастер-классыштым ончен, шке пашаштат кучылташ лиеш. Моло туныктышо-влакат моткоч оҥай урок-влакым ончыктышт. Теве Тамара Николаевна Абрамован урокшо мылам пайдале ыле. А конкурс пӱтынек оҥай да кӱлешан.

Марий-влакын илыме вес кундемлаште марий йылмым туныктымо пашан чапланымыже куандара. Туныктышо-влаклан чытымашым да мастарлыкым тыланена.

Эльвира Терентьева.
Фотом еш альбом гыч налме.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: