"Корнывожышто вашлиймаш" рубрик, 2016 ий, Вӱдшор тылзын 29-ше кечыже

Морко кундемын “Рвезылык” ансамбльже

Статьян авторжо Татьяна Иванова

Морко кундем мылам – чон шепка, тушто шӱмем каналта, тушто чылажат мотор да сӧрал. Тыглай илышыш марий шӱлышым, сылнылыкым пуртымаште изижге-кугужге тыршат. Тӱвыра аланым поян мурпого, куштымаш дене чапландарат. Калык куштымашым ончыктышо “Рвезылык” ансамбльжак мом шога! Чатката ӱдыр-рвезе-влакын усталыкыштым ончен, шӱм-чон ыра, кумыл нӧлтеш. uPE4p6YvGuk

Ты коллективлан – 46 ий, тудым чолга марий пӧръеҥ, Марий Эл тӱвыран сулло пашаеҥже

Валерий Алексеевич Якушев чумырен да уло моштымашыжым пыштен вуйлатен. Чаманен каласаш логалеш, шукерте огыл талантан еҥын ӱмыржӧ лугыч лийын. Финн-угор тӱняште “Рвезылыкын” йӱкшӧ эреак йоҥген, тудо ятыр конкурсышто да фестивальыште мастарлыкше дене ӧрыктарен, ик гана веле огыл лауреат ден дипломант лӱмым сулен. 2014 ий гыч ты коллективым Валерий Якушевын Александр эргыже вуйлаташ тӱҥалын. Еш династийым шуят тудын пелашыже, Морко калык театрым вуйлатыше, режиссер Анна Васильевна Якушева, да нунын чыла шочшышт. “Рвезылык” ансамбль 1972 ий годсек калык лӱмым нумалеш.

“14-17 апрельыште “Танцуй и пой, Россия молодая” тӱнямбал кӱкшытан Х фестиваль-конкурсыш миен коштна. Тудо Суздаль ден Владимир олалаште эртен. Калыкын мурен-куштымо сымыктышыжым арален толшо, тидлан самырык тукымым кумылаҥдыше уста коллектив-влак тушко толыныт. Конкурс талантан ӱдыр-рвезе-влакым кычалеш, шым ияш гыч кумло вич ияш самырык-влак шке мастарлыкыштым тӱрлӧ номинацийыште ончыктеныт. Морко район администрацийлан, поснак тӱвыра пӧлкам вуйлатыше Юлия Николаевна Яковлевалан тора корныш лектын кошташ полышым пуымыштлан таум каласена», — мане Александр Якушев.

Морко вел ӱдыр-рвезе-влакын выступленийышт чылалан чот келшен. Чиемыштат сылне, шкеныштым сценыште чаткан кучат, шыргыжал колтат гын, уло нойымым мондет, илышлан куанет. Тӱнямбал фестивальыште калык лӱмым нумалше, куштышо “Рвезылык” ансамбль икымше премийын лауреатше лӱмым сулен, кугу сеҥымаш дене пӧртылын. Ансамбльыш Морко поселкышто тӱрлӧ вере пашам ыштыше самырык-влак коштыт. Тиде коллективыште шуко ӱдыр-рвезе куштен, южышт артист марте кушкыныт. “Рвезылык” тачат шочмо калыкын йӱлажым куштымаш гоч ончыкта, а чыла тидым ышташ нуным Якушевмыт еш кумылаҥден шога.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: