"Ме марий улына" рубрик, 2016 ий, Вӱдшор тылзын 15-ше кечыже

Оньыжан докладше

Статьян авторжо редактор

article716Х Марий калык погынышто Оньыжа А.Ивановын докладше йоҥгалтын. Анатолий Николаевич ныл ий жапыште землячестве-влакын пашаштым, посна еҥ-влакын чолгалыкыштым палемден коден. Докладыште поснак кугу верым марий йылмым тунемме йодышлан ойырымо. Школлаште тудым шочмо йылме да кугыжаныш йылме семын туныктымо шотышто йодыш дене умбакыже пашам ыштыман манын палемдыме. А.Иванов республикысе образований да науко министерстве деч Мер Каҥаш лӱм дене школлаште марий йылмым туныктымо шагатым арален кодаш йодын. Тыгак республикын правительствыж деч марий учебникым савыкташ окса дене полшаш йодмаш лийын.
«Йоҥылыш ида лий, йочадам марла туныкташ тыршыза. Йылмынам шке кид дене пытараш ида пу», — каласен Оньыжа А.Иванов.
«Марий илышым вияҥден колтымаште самырык тукым шуко ыштен кертеш, нуным мер-политике пашаш утларак ушыман. Ончыкылык политиклан ямдылыме пашаш тачак кыртменак пижман», — ойлен Анатолий Николаевич.
Ситыдымашымат палемдыде кодымо огыл. СМИ пашам вияҥдаш, редакций-влакын материально-технический базыштым пойдараш кӱлеш. Журналист-влак коклаште профессионал семын ойыртемалтше-влак шагалын улыт, почто пашан начарлыкшат тургыжланаш тарата, манын Оньыжа.
Мучашлан А.Иванов уло марий калыклан пашаче улмыжлан, марий йӱлам арален кодымаште тыршымыжлан тауштен, у Оньыжа дене пашам вияҥдаш темлен.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: