"Рубрик деч посна", 2016 ий, Вӱдшор тылзын 25-ше кечыже

Пошкырт кундемын марий газетшылан — 25 ий

Статьян авторжо Эльвира Терентьева

25 ий ончыч 24 апрельыште марий-влакын тӱшкан илыме верыштышт – Пошкырт кундем Нефтекамск олаште – “Чолман” газетын икымше номерже лектын. Таче “Чолман” газет Нефтекамскысе Печать пӧрт дене пырля — «Республика Башкортостан» издательский пӧртын филиалже. Тунам чолга марий пӧръеҥ Игорь Иванович Губаев газетын икымше номержым лукмаште тыршен. Тыге марий газетым савыктыме сомылым ыштен кертмыштым Нефтекамск оласе советын депутатше-влаклан ончыктеныт.

Тылеч ончыч, 1962-1965 ийлаште, олаште “Красное Знамя” газет савыкталтын, тудым татар, марий да удмурт йылмылашке дублироватлыме. Но варажым марла газет Калтасашке куснен, а марий выпускым ямдылыше Илья Караев ден Алексей Мурзашев Нефтекамскыштак кодыныт, икмыняр жап гыч А.Мурзашев Йошкар-Олашке каен.

Мо оҥайже? Икымше номер лекме деч вара Игорь Губаевым редакторлан шогалтеныт. Но тудо милиций гыч куснен кертын огыл. Кум ий деч вара ты пашам пӱтынек шке кидышкыже пеҥгыдын налын да шке шочшыжым — “Чолман” манын лӱмдымӧ газетым – кудалтен каяш тоштын огыл.

25 ий жапыште ятыр вашталтыш лийын докан?” — йодым Игорь Иванович деч. “Икмыняр номерым луктын ончымеке, газет пел ий гыч лекташ тӱҥале. Тунам компьютер уке, типографийыште буква-влакым кид дене погыман ыле. Ондак 11 еҥ пашам ыштен, а кызыт чыла сомылым нылытын шуктена: тӱҥ редактор, ответственный секретарь, ик корреспондент да пел ставкыште улшо верстальщик. Шукерте огыл Уфасе издательстве пӧртын филиалже лийна”, — каласыш Игорь Иванович.

Кажне арнян ныл страницан “Чолман” газет ятыр марий ешыш мия. Тиражше – 2000 экземпляр. Внештатный автор-влак уло кумылын пашам ышташ полшат. “Нылытын гына улына, но ешна кугу. Возышо-влакымат шкенан ешналан шотлена. Кызыт конкуренций кугу гынат, рекламымат ышташ тыршена”, — ойла тӱҥ редактор.

Ты коллективыште пашам ыштыше-влакын лӱмыштым каласыман: Игорь Губаев, Людмила Шавалиева, Энна Губаева да Олеся Калиева. Лудшо-шамычлан тӱрлӧ теме дене материал-влак темлалтыт. Чӱчкыдын лекше лаштык-влак коклаште “Тукымвож”, “Мер илыш”, “Изеҥер”, “Мыскараже – илышыштак”, “Ойлышаш шомакем уло”, “Айдеме пашаж дене мотор”, “Ял озанлыкыште”, “Закон, кучем да илыш” да молат улыт. Икманаш, Нефтекамскыште лекше “Чолман” газет марий калыкым чак чумыргаш полша, икоян лияш да пырля лияш тарата. Пайремда дене, коллегына-влак!

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: