"Рубрик деч посна", 2016 ий, Вӱдшор тылзын 29-ше кечыже

Путин дене пырля тӱрлӧ йодышым каҥашеныт

Статьян авторжо Светлана Кушакова

24-25 апрельыште Йошкар-Олаште Общероссийский калык фронтын регионласе “Форум действий. Регионы” форумжо эртен. Мероприятийыште элнан 21 регионжо гыч толшо 500 наре еҥ “Калык фронтын” активистше, журналист, министерствыла да ведомствыла гыч представитель-влак участвоватленыт. Форумын кокымшо кечын Марий Элыш Россий президент В.Путин толын.

Икымше кечын вич тематический площадке пашам ыштен.

Общество и власть: прямой диалог” площадкыште общество да кучем коклаште сай кыл лийже, калык кӱлеш информацийым писын муын кертше манын, кугыжаныш орган-влакын сайтыштым шотыш, ик стандартыш кондаш темленыт. Тыгак граждан-влакын кредит парымыш пурымыштым, коллектор-влакын пашаштым тергыме, панкрутыш лукмо радамым куштылемдыме йодышым нӧлталыныт. Калыкын йодышыжым погаш ик федеральный колл-центрым ышташ темленыт.

Образование и культура как основы национальной идентичности” площадкыштат каҥашымаш шокшын эртен. Ончыкылык тукымым ушан-шотаным куштынена гын, образований йодышым шотыш кондыман, каласеныт активист-влак. Тыште единый кугыжаныш экзамен ваштареш шогышо-влак лийыныт. Йочасад да тушто вер ситыме, йоча-влакым транспорт дене шупшыктымо, тачысе илышлан келшыше туныктышо кадрым ямдылыме, йоча-влакым патриотизм шӱлышыштӧ куштымо йодыш-влакым тарватыме. “Об образовании” законышто икшывылан пашам ышташ чарыме шотышто пунктым кораҥдаш палемдыме.

ЖКХ, капитальный ремонт, корным ыштыме, олмыктымо паша, “Аварийный илыме вер гыч граждан-влакым кусарыме” программым шуктымо йодыш-влакым

Качество повседневной жизни” площадкыште каҥашеныт.

Честная и эффективная экономика” — ялозанлык да промышленность, экологий да калыклан паша верым ситарыме, импортозамещений нерген мутланыме. Частный предприниматель да фермер-влаклан ужалыме кугу сетьлашке лекташлан квотым пурташ темленыт.

Поснак тазалыкым аралыме сферыште йодыш-влак пӱсын шогат. Тидын шотышто президентын порученийжым шуктымым “Социальная справедливость”площадкыште онченыт. Медицине — ик эн социально кӱлешан сфере. Тудо тыгакат кӱлеш кӱкшытыштӧ огыл, качество могырымат уда, но тазалыкым аралыме министерствын оптимизацийым эртарымыжлан кӧра сӱрет эшеат уда могырыш вашталтын, палемдат “фронтовик-влак”. Ятыр регионысо эмлымверлаште врач-влак огыт сите, икмыняр тылзе дене нунын деке черетыште шогыман да молат. Медицине шотышто сӱрет сай могырыш вашталтше манын, мерым ыштыман, паша планым ямдылыман, каласеныт нуно. Инвалид-влак шотыштат йодышым тарватыме. Эн ончыч йоча инвалид-влакым шагалемдыме шотышто профилактике пашам эртарыме радамым палемдаш, инвалид йочан еш-влаклан социальный полышым пуымо пашам эртараш темленыт.

Тылеч посна эше ятыр моло тургыжландарыше йодыш-влак ончалтыныт. Эн кӱлешанжым пленарный заседанийышке каҥашымашке лукташ палемденыт.

Форумлан кӱлешын ямдылалтме. Регионласе да федеральный пашаче группо ден эксперт-влак 15 тӱрлӧ мониторингым да йодыштмашым эртареныт. Чылаже 20 тӱжем активист пашам ыштен. Мониторинг да йодыштмаш почеш эн пӱсӧ йодышыжым форумышко лукмо. “Шонем: пырля кажне йодышлан вашмутым, тудым решатлыме корным муына”, — ойлен ОНФ-ын Центральный штабшын сопредседательже А.Бречалов.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: