"Рубрик деч посна", 2016 ий, Вӱдшор тылзын 14-ше кечыже

“Саликаште” — Чопай, “Феодалыште” — шоҥго купеч

Статьян авторжо Татьяна Иванова

М.Шкетан лӱмеш Марий театрын самырык артистше Андрей Яруков дене палымым ыштена.

Тудо Волжский район Пӧтъялыште шочын. Тысе кыдалаш школышто кандаш класс марте тунемын да туштак верланыше Волжск оласе 5-ше номеран профессиональный училищын филиалышкыже тунемаш куснен. Вич ий тунемын: ончыч каменщиклан да плотниклан, вара кум ий – сварщиклан да ялозанлыкыште пашам ыштыше тракторист-машинистлан. IvPNT-yqyeY

Школышто тунеммем годым сцене деч лӱдынам, моткоч аптыраныше лийынам. Но сценышке мыйым ала-можо шупшын. Шкемын вожылмем сеҥен, школышто хореографий кружокыш кошташ тӱҥалынам. Тудым туныктышо-хореограф Вячеслав Петрович Романов вуйлатен. Тудлан моткоч кугу таум каласем. Мыйым кушташ туныктен да актерын мастарлыкше шотышто икымше урокым пуэн, сцене дене палымым ыштен”, — ойла Андрей (снимкыште шолаште).

Изиж годым Андрей художник лияш шонен. Тудын кок акажат моткоч сайын сӱретленыт. Изирак акаже, Вероника, Йошкар-Оласе художественный училищыште кок ий тунемын, но окса укелан кӧра тунем пытарен огыл. Андрей тӱҥалтыш класслаште эре сӱретлен, кружокыш коштын. Рисований дене эре визытаным налын. Вара куштышо але актер лияш шонымаш чонжым авалтен. Малаш вочмеке, эре музыкым колыштын, ушыж дене эре куштен. А кунам иктаж кином ончен, шкенжым тусо герой олмышко шынден, тудын олмышто иктаж ситуацийыште кузе да мом ыштем ыле манын шонкален.

Яруков армийыште порысшым шуктен. Тушеч пӧртылмек, 2010 ийыште, Москвасе Щепкин лӱмеш кӱшыл театр училищыш тунемаш пурен.

Театр вузыш логалме – илышыштем ик кугу пиал. Армийыште улмем годым авам ӱмыр лугыч колен, ача деч изи годымак тулыкеш кодынам. Мӧҥгӧ пӧртылмек, ӱдыр-рвезе-влакым артистлан тунемаш колтымо нерген уверым колынам, шкемым тергаш шоненам. Шкетан театрын тунамсе директоржо Юрий Петрович Русанов мыланна кресача гай лийын. Театрын ончыкылык илышыж нерген шонен, мемнам тунемаш колташ полшен. Москваште тунеммына годымат кажнына нерген палаш тыршен. Шкетан лӱмеш театрыш у вийын, самырык специалист-влакын толмыштым моткоч вучен. Тудо ок тырше гын, ала тунемашыжат огына кай ыле. Поро кумылжым, марий тӱвыра верч чонжо йӱлымым ме огына мондо”, — манеш Андрей Яруков.

Москваште тунемме годым марий рвезе утларакшым эре шоҥго кугызан рольжым модын. Тиде М. Горькийын пьесыже почеш шындыме спектакльыште — Василий Васильевич Бессеменов, Карло Гальдонин пьесыже почеш шындыме “Феодал” диплом спектакльыште — шоҥго купеч Сеньор Панталоне, “Русский секрет” йомакыште — Машан ачаже, шоҥго, чаҥга Грознов кугыза. Чыла шоҥгыеҥын рольышт отрицательный. Икманаш, тымарте модмо чумыр персонаж чоя да чаҥга, тыгак чоя, весела да тале… Весела чоя да тале улыт “Саликаште” Чопай, Эдуардо дэ Филиппон “Цилиндр” пьесыштыже — Агостино. А илышыште Андрей проста, поро, нигӧланат нимом ок чамане, театрым, пашажым йӧратыше еҥ.

Салика” спектакльышке мемнам, самырык актер-влакым, тунем толмек, кок тылзе коклаште модаш пуртышт. Мыйын шонымаште, “Салика” — Шкетан лӱмеш Марий театрын эталонный пашаже. Тушто лӱмлӧ марий актер ден актрисе-влак модыныт. Тиде спектакльым марий калык наизусть манмыла пала. Сценыште иктаж-могай йоҥылышым ыштет гын, ончаш толшо тидым вигак умыла, парняж денат ончыкта. Кунам занавес почылто, залыште тынар калыкым ужмек, икмыняр секундлан ушем гыч чыла мут лектын кайыш, вуйым тӱтыра авалтымыла чучо. Мемнан ӱмбалне кугу ответственность лийын. Тиде куандарен, тунамак лӱдыктен да шкем тергаш вийым пуэн”, - манеш актер.

Чынак, Андрей Яруков — ура шӱм-чонан рвезе. Тудо Пӧтъял школышто тунеммыж годымак “Кугарня” газетын эртарыме “Воштылаш, товатат, сулык огыл” мыскара фестивальыште участвоватлен. Тусо коллектив “Шояче Славочка” мыскара куштымашым ончыктен ыле, тунам Андрей моткоч устан куштен.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: