"Рубрик деч посна", 2016 ий, Вӱдшор тылзын 16-шо кечыже

Х Марий калык погын: кокымшо кече

Статьян авторжо редактор

16 апрельыште Х Марий калык погыныш чумыргышо-влак умбакыже пашам ыштеныт. Марий Эл правительстве вуйлатышын алмаштышыже, тӱвыра, печать да национальность паша шотышто министр М.Васютин тӱҥалтыште Марий Эл радион тӱҥ редакторжо В.Матвеевлан мутым пуэн, молан манаш гын Марий Эл деч тораште илыше-влак Интернет гоч радиом кузе колышташ лийме нерген шукын йодыныт. Радиопашаеҥ икмыняр йӧным темлен. Кызыт радиом приемник але компьютер полшымо дене гына огыл, «мобильник» гочат колышташ лиеш. «Тидлан «ТВ и радио на патриаршей» приложенийым шке телефоныш вераҥдаш гына кӱлеш. Авамын йодмыж почеш тыге ыштен пуэнам да ынде тудо пакчаштат, сурт коклаштат телефон гоч йӧратыме радиожым колыштеш», — мане В.Матвеев.
Вара мут пуалтын Мер Каҥашын еҥже Татарстан гыч О.Третьяковлан. Тудо шке кундемыштыже марий илышым вияҥдаш мо ышталтмым каласкален, Марий Элыште илыше-влакланат шочмо калыкнан сынжым арален кодымаште чолгалыкым ончыкташ темлен.
Мер Каҥашын сайтшым уэмден шогышо, чолга блоггер Э.Куклина Интернетыште кузе марий илыш вияҥмым радамлен. Ончычсо Оньыжа В.Пектеев марий калыкын чон ойгыжым почын пуаш тыршен.
Погынышто тыгак Одо кундем, Пошкырт вел гыч толшо-влак выступатленыт, ыштыме паша, ончыкылан кузе лийшашым палемденыт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: