"Кидмастар" рубрик, 2016 ий, Вӱдшор тылзын 15-ше кечыже

Шочмо тӱс тӱрыш возын

Статьян авторжо Анастасия Эманова

Йошкар-Оласе “Сайвер” ательеште ӱдырамаш ден пӧръеҥ-влаклан вургемым, руш, марий, татар, башкир да моло тӱрлӧ национальный костюмым ургат, тыгак марий тӱран галстукым, окнасакышым, ӱстембал шовычым ямдылат, марий вургеман курчакым, шӱшерым ыштат. Ужгам, пальтом, курткым тӧрлатат, теркупшым ямдылат.

м06“Сайвер” 1993 ий годсек пашам ышта. Кызыт тудым Ольга Михайловна Бурдина вуйлата.

Йодмаш ситышын пура. Вес кундемлаште илыше марий-влакат тувырым ургыкташ толыт але, телефон дене йыҥгыртен, заказым ыштат”, - ойла директор.

Ателье чапле сатум темла. Таклан огыл тудо ик гана веле огыл “Республикын эн сай сатужо” конкурсышто сеҥыше лийын. А 28 апрельыште Йошкар-Оласе Торгово-промышленный палатыште “Российысе 100 эн сай сату” конкурсын регионысо этапше лиеш. Кызыт “Сайвер” тудлан ямдылалтеш. Тылеч посна Марий погын годым М.Шкетан лӱмеш Национальный драме театрыште да мер-политике рӱдерыште ятыр национальный вургемым, меж гыч йӧрымӧ 100 утла теркупшым ужалымашке луктын.

Марий тӱвыра рӱдерын пашаеҥже-влак пеш чолга улыт. Нуно мемнан деке марий тӱран вургемым ургыкташ чӱчкыдын йодмаш дене толыт. Марий тӱр мотор, но тыгай вургемым ыштымаште пӱсӧ шинчан лийман. Паша тӱткышым да чытышым йодеш. Сатулан ак кугу огыл. Шуко тӱран тувыр, конешне, шергырак шога. Пӧръеҥ-влаклан тыгай тувыр 3000-6000 тӱжем теҥгеш шуэш, а ӱдырамаш-шамычлан 3500 да утларак тӱжем теҥгеаш, - ойла тӱҥ бухгалтер, марий ӱдырамаш Валентина Ивановна Алмаметова. — Йодмашым писын шукташ тыршена. Кеч-могай вургемым ойыртемалтшым ыштена. Тӱран тувырым ургаш жап утларак кая. Эн ончыч тӱрым калькыш сӱретлыман, вара тудым куэмыш кусарыман да тӱрлыман. Район гыч йодмаш шуко пура. Ял гыч еҥ-влак толыт гын, жапым шуйкалыде, нунын деч меркым налына”.

м01Ательеште пашаштым палыше профессионал-влак ыштат. Чылаже 14 еҥ тырша. Нуно, заказчикын йодмашыжым вашке да чаплын шукташ манын, эрденак толыт да кастенат южгунам кодыт. Модельер-конструктор Лариса Яковлевна Смирнова “Сайверыште” икымше ий веле огыл пашам ышта. Руш ӱдырамаш шукерте огыл Интернет гоч марий йылмым тунемаш тӱҥалын. “Марий тувырым йодын толшо еҥ-влак шукыж годым марла мутланат, садлан нуным умылаш манын, марий йылмым тунемаш кумыл лектын”, - манеш Л.Смирнова.

Кажне еҥ чапле вургемым сай верыште ургыктынеже. “Сайвер” ательеш толын, але марте ик еҥат ӧкынен огыл.

Теве, мутлан, Москошто ятыр ий илыше ик марий пӧръеҥын 50 ияш лӱмгечыжлан йолташыже “Сайвер” деч марий вургемым налын, пӧлеклен. Тудо моткоч куанен. Пачаш-пачаш чиен ончен, тыгодым марла кушталтен, муралтен. Икманаш, пӧлек чонжылан келшен.

 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: