"Рубрик деч посна", 2016 ий, Вӱдшор тылзын 19-ше кечыже

Шымакшым тӱслен ончен…

Статьян авторжо Эльвира Терентьева

Эчан

Таче тендам Санкт-Петербургышто илыше марий рвезе Эчан Иванов дене палымым ыштена. Тудо У Торъял район Кугу Вуръялыште шочын-кушкын. Латик классым тунем пытарымеке, Йошкар-Оласе художественный училищыште ныл ий тунемын. 2003 ийыште Санкт-Петербургысо театральный академийыш художник-постановщиклан тунемаш пурен. Кызыт ты оласе на Васильевском кугыжаныш драмтеатрыште пашам ышта, декораций мастерскойым вуйлата.

Изиж годсек Эчан марий калык йӱлалан шӱмаҥын. Кызыт Санкт-Петербургысо да Ленинград областьысе тӱрлӧ мероприятийыште шке мастарлыкшым ончыкта: мура да кушта, кидпашаже-влакым ончыкта. Теве 2 апрельыште ик полатыште марий кас-дискотекым эртареныт. Тушко 70 утла еҥ толын. Нуно, марий муро почеш куштен, шке койышыштым ончыктеныт.

Икте ӧрыктара: кузе рвезе марий тӱрым тӱрлаш кумылаҥын. Ешыште кумытын кушкыныт, чыланат рвезе-влак. Ачашт — механизатор, авашт — ветеринар. Кызыт коктынат пенсийыште улыт.

- Тӱрлаш нигӧат туныктен огыл, шкеак тунемынам, — каласкала Эчан. — Изиэм годсек мылам марий тӱр моткоч келшен! Чуланыште ковам-шамычын шымакшыштым, тувыр-шовыр урвалтыштым тӱслен онченам! Кажне пӱшкылым мел могыржо гыч пӱшкылын, тӱр гыч умбакыже куш кайымыжым ончен-шымлен шинчылтынам! Конешне, тӱрлымаш — пӧръеҥ паша огыл, но мо дене мыйым тыге сымыстарен, каласен умылтарашат йӧсӧ! Адакшым У Торъял краеведческий музейысе фондышто марий тӱрын поянлыкшым ятыр гана куанен онченам! Отпускыш толмем еда тушко миен толам. Пашамже пеш шукыжак уке: шканем кум пӧръеҥ тувырым тӱрленам, авамлан тувыр дене ончылшовычым пӧлекленам, кумлукан солыкым ямдыленам. Кызыт ӱдырамаш тувырлан урвалте тӱрым посна мел дене ыштем.

Эчанын

Кызыт олаште могай марий шӱлышан мероприятийлан ямдылалтыда?” — йодым Эчан деч. “Агавайрем марте жап шуко кодын огыл, тудын нерген шоныман. Ме шке марий койышнам, кугезе-шамычын ойыштым кертмына семын шуктен шогашак тыршена да моло калыкым шкенан калыкын культурыж дене палдарен шогена”, — каласыш Эчан Иванов.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: