"Рубрик деч посна", 2016 ий, Ага тылзын 30-шо кечыже

Шке шулдыретым кычал му !

Статьян авторжо Эльвира Терентьева

Окрыленные мечтой

Москошто илыше фотограф Дарья Кузнецова ден Марина Полянская начар тазалыкан ӱдыр-влаклан, поснак коляскыште шинчыше-шамычлан, оҥай проектым шонен луктыныт. Тудым “Шулдыран шонымаш” (“Окрыленные мечтой”) манын лӱмденыт.

Ты проект Москошто кодшо ийын эртен. Автор-влак инвалидностян да тыгодымак тӱрлӧ сеҥымашыш да кӱкшытыш шушо 12 самырык ӱдыр нерген каласкаленыт. Съёмко кеҥежым эртаралтын. Нуно шкем модель верыште тергеныт. Самырык ӱдыр-влак тӱрлӧ амаллан кӧра инвалид коляскыште шинчат. Но тидыже нунылан илаш, йӧраташ, сеҥаш, шке пашаштым шукташ да шонымашыш шуаш кугу чаракым огеш ыште. Участнице-влак коклаште параолимпийский модмашын участникше, социальный проектлам вуйлатыше, медийный личность да иктаж-вере сеҥымашан ӱдырамаш лийыныт.

“Шулдыран шонымаш” — тыглай фотопроект гына огыл, а социальный эксперимент. Тудо начар тазалыкан еҥ-влак нерген шонымашым вашталташ ӱжеш, мода нерген каласкалыше журналысе гайым огыл, а чын, тӱням савырен кертше моторлыкым ончыкта. Вет ты еҥ-влак кеч-могай илыш ситуаций гоч лектын моштат. Кӧ яра огеш шинче да шке вийжым чын кучылтеш, тудо сеҥымашышке шуэш. Участнице-влак тидым пеҥгыдемден ончыктат. Тылеч посна фотопроект инвалидностян еҥ ден общество коклаште психологий шӱлышан чаракым кораҥдаш полшышаш. Вет але калык але начар тазалыкан еҥ деке тунем шуын огыл, тудым ӧрын да лӱдын онча.

Москошто съёмко эртымек, фото-влакым выставкыш чумыреныт. Тудым калыклан презентаций йӧн денат ончыктеныт. Тиде уверым ужмеке, Медведево посёлкышто илыше Ольга Ребколан тиде шонымаш путырак келшен. А молан Йошкар-Олаште тыгаяк фотопроектым ышташ огыл манын вигак шоналтен. Дарьялан йыҥгыртен да йодын: “Тиде шонымашдам элна мучко шараш шонеда мо?” Пучын вес мучаштыже шоктышо вашмут куандарен: “Мый тидын нерген шукертак шоненам. Оҥай темлымаш лиеш гын, ямде улам”. Тунам Ольга йолташыже-влак дене мутланен. Нунышт моткочак куаненыт! Садлан ,жапым шуйкалыде, Дарьялан вашештен: “Тыгай фотопроектын республикыште эртараш кӱлеш!”

Кызыт Йошкар-Ола, Медведево, Шернур гыч ӱдыр-влак ты проектыш ушнаш кумылаҥыныт. Съёмко июнь мучаште-июль тӱҥалтыште лийшаш. Тудым Йошкар-Оласе Тӱҥ паркыште эртараш палемденыт. Кызыт шым ӱдыр – Анна Матевеева, Ирина Лежнина, Светлана Яшманова, Анна Чепайкина, Ольга Пасеева, Елена Оленева да Ольга Ребко – шкем модель верыште шижаш ямдылалтеш. Но ӱдыр-шамычлан калыкын полышыжо кӱлеш. Фотограф ден тудын полышкалышыже-влаклан рӱдолаште илаш да пашам ышташ, ӱдыр-шамычлан партнёр-влакым кычалыт. Кызыт икмыняр фирме полыш кидым шуялтен, нуно умылат: вет тидыже социально значимый инициативылан полшышо организаций-влаклан сай репутацийым шочыкта.

Тӱняумылымашыж дене ойыртемалтше, илышым умылышо 32 ияш Ольга Ребко тиде фотопроектын координаторжо семын тырша. Коляскыште шинчыше ӱдыр кӱшыл шинчымашым налын, ятыр йот йылмым тунемын, кусарыше семын пашам ышта. Тылеч посна Беларусьышто савыкталтше ик газетыш журналист семын возкала. А курчак-влакым чонаҥдымыже, тӱрлӧ образым шочыктымыжо уста дизайнер улмыжым пеҥгыдемда. Тений 25 апрельыште Йошкар-Олаште Российысе калык фронтын форумыштыжо президент В.Путинлан шке ыштыме курчакым кучыктыш.

Тек ӱдыр-влакын шулдыран шонымашышт шукталтеш. Кӧн йӧнжӧ уло – полшыза.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: