"Рубрик деч посна", 2016 ий, Ага тылзын 30-шо кечыже

Шочшан лияш — пиал

Статьян авторжо Эльвира Терентьева

Йошкар-Олаште эртышаш фотопроектыш ушнаш келшыше ик участнице – Медведево посёлкышто илыше 34 ияш Ирина Хухарева (снимкыште). Тудо Россий инвалид обществын Йошкар-Оласе да Медведевысо пӧлка-влакын эртарыме ятыр мероприятийыш уло кумылын ушна. Поро, тыматле койышан ӱдыр спортлан шӱмаҥын, теннис дене модеш, пидме пашажым тӱрлӧ выставкыште ончыкта… А кодшо ий ты мотор ӱдыр марлан каен да азам ыштен. Коляскыште шинчыше еҥлан тидыже — кугу сеҥымаш. Тидым ышташ чыла инвалид огеш тошт…

Ирина11

2012 ийыште Йошкар-Олаште инвалид ӱдыр-влак коклаште “Мисс Обояние” конкурс эртаралтын. Тушто Евгений Хухаревлан ӱдыр-влакым жюри семын аклаш темленыт. Ирина конкурсышто сеҥышыш лектын. А икмыняр жап гыч Евгений тудлан интернет гоч возен колтен, тыге келшаш тӱҥалыныт. Кодшо ийын февральыште Йошкар-Оласе у загсыште возалтыныт. Августышто Ирина ӱдыр азам ыштен. Кызыт Хухаревмыт Ульяна ӱдырышт дене пырля волгыдо илышлан ӱшанен илат. Лач тудо ача-аван эҥертышышт, полышкалышышт кушкеш. Вет Иринан пелашыжат – колясочник.

Ирина шочынак инвалид огыл. Ешыже ты посёлкысо посна пӧртыштӧ илен. Лу ияшыж годым Ирина шольыж дене верандыште модын. Воктенак, подвалыште, котельный вер лийын. Шольыжо омса почын коден улмаш, а Ирина тидым ужын огыл, шке семынже тӧрштылын. Ала-мо гутлаште тушко комдык пуреҥгаен. Тошкалтыш мучко тупшо дене пӧрдын волен. Тудыжо кок метрат пеле наре кӱкшытан лийын. Тиде октябрьыште лийын. Тылеч вара эше ик тылзе тунемаш коштын. Но ик кечын эрдене Ирина кровать гыч кынелын огыл, йолыш шогалын кертын огыл. Ятыр эмлалтын, но мо лиймым ик врачат каласен кертын огыл.

Варажым Медведево посёлкысо 3-шо №-ан школышто 11 классым тунем пытарен. Тетла нигушто тунемын огыл. Ик жап интернетлан эҥертен пашам ыштен. Тыгак “Вирджиния” кусарыме бюрошто пел ий заказым наледен. Мӱшкыраҥме деч вара пелашыже пашаш кошташ чарен.

Такшым Иринан пелашыже, Евгений, мӧҥгыштӧ канат полшымо дене коштеш. Кужу корным каен огеш керт, тудым коляске полшымо дене гына эрта. Женя 20 ияшыж годым шӱйжым эмгатен. Тӱжваке лекташ тудлан куштылгырак, коляскым веле уремыш луктын пуыман. Кызыт кум пӧлеман пачерыште чыланат пырля илат: ик пӧлемыште – Ирина йочаже да пелашыже дене, весыште – изаже пелашыж да шочшыж дене, кумшышто – Иринан шольыжо, аваже ден ачаже.

Медведево районын администрацийже ты пачерыш пандусым ышташ шукертак мутым пуэн. Ирина шомаклан ӱшанен да кузе ыштышашым ончалаш толшо-влакым кок ий вучен. Тений шошым администрацийыш каен, йодмашым возен. Шукерте огыл ты верым вискаленыт, лишыл жапыште пандусым ышташ сӧреныт. Ты кеҥежым Ирина ден Евгений балкон гоч вигак уремыш логалын кертмыштлан ӱшанат. Родо-тукымышт полшаш тореш огытыл гынат, тӱжваке шкан лекташ сайрак.

“Тиде фотопроектыш ушнымаш инвалид-влакым вес семынрак ончаш, шижаш да умылаш тӱҥалаш полшышаш, — манеш Ирина. — Теве инвалид-влакын мӱшкыраҥмыштымат врач-влак шӧрын ончат. Мый декем нуно кошташ тореш лийыныт, сандене тазалыкым аралыме шотышто министр лӱмеш серышым возаш логалын. Тылеч вара гинеколог, невролог, терапевт, окулист да вӱрым налаш специалист-влак мӧҥгышкем толын коштыт ыле. Илыш тыгае: вуйшиймаш але кагаз деч посна нимогай полышым от уж”.

Хухаревмытын сай ончыкылыкыштлан ӱшаныме шуэш. Вет ешын озаже, Евгений, интернет йӧн дене ешлан оксам конда. Шукерте огыл Медведево посёлкышто инвалид-влаклан йӧнештарыме 76 квадратный метр кумдыкан ик пӧлеман пачерым налын. Кызыт тушто олмыктымо паша кая. А иктаж ик ий гыч шке пачерыштышт пӧртсий пайремым ышташ шонат.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: