"Илыш йогын" рубрик, 2016 ий, Пеледыш тылзын 7-ше кечыже

Келшымаш кыл ден корным почынна

Статьян авторжо Татьяна Иванова

Тиде арнян, 25 майыште, Марий Турек районысо Сардаял школышто “Кугарня” газет редакций вашлиймашым эртарен. Тиде кечынак мланде, кусараш лийдыме пого йодыш дене Росреестрын Шернурысо филиалже гыч специалист-влак …. консультацийым яра пуэныт, тыгак артист-влак А.Егошин, Т.Умурбаева ден С.Пчёлкин клубышто сай концертым ончыктеныт.

Кызыт школлаште пытартыш йыҥгыр йоҥгалтеш, тунемше-влакын экзаменышт тӱҥалын, школ дене чеверласат. Тыгаяк шӱлыш Сардаял школымат авалтен.

Паша шыгыр гынат, тунемше ден туныктышо-влак мемнам уло кумылын вученыт да вашлийыныт. Ме пырля намийыме уна-влак дене палымым ыштышна, газетна дене палдарышна, изирак викториным эртарышна. Викториныште ойыртемалтше-влакым пӧлекым кучыктышна. Тунемше-влакат уна-шамычлан йодышым пушышт. Теве Марий Элын калык артистше Александр Егошин деч могай йотэллаште лиймыж нерген пален нальыч. Александр Федорович тыге вашештыш: “Алексей Искандаров лӱмеш капеллын солистше семын ятыр элыште — Германийыште, Финляндийыште, Францийыште, Голландийыште… — лийынам. Кеч-куштат марий мурым, семым уло кумылын колыштыт, кеч-кушто лийынам гынат, марий улмем дене кугешненам да марий мурым йӧратен муренам. Тачысе вашлиймашымат кугу пиаллан шотлем”.

Вара шкеж нерген Марий Элысе ветслужбын “Ветинария” газетын редакторжо, мурызо Татьяна Умурбаева палдарыш. Татьяна Витальевна Пошкырт кундемысе Октябрьский музучилищым тунем пытарымыж деч вара школышто музыкым туныктен. Йошкар-Олашке МарГУ-шко тунемаш толын, журналистлан тунем лектын. Тыгодымак Марий филармонийыште пашам ыштен. Ятыр муро конкурсышто сеҥыше лийын. “Мыят тендан семын ала-кунам тыгай мотор школ формым чиенам. Кунам школышкыда пурышым, чонем вургыж колтыш, туныктымо пагытем шарналтышым. Тунемше-влак дене кутыраш мыламат кугу пиал”,- мане тудо.

“Марий Эл” кугыжаныш мурышо да куштышо ансамбльын оркестржым вуйлатыше Сергей Пчёлкин шкешотан музык урокым эртарыш. Гармоньым шоктымо почеш чыланат “Аваем” мурым муралтышт. А вара марий сем почеш кушталтыш. Сергей Александрович семӱзгар-влак дене палдарыш, тудат самырыкше годым Морко районысо Волаксола школышто музык урокым туныктен.

Газетнан фотокорреспондентше Иван Речкин пашаж нерген кумылын каласкалыш, У Торъял районысо Немда школышто тунеммыж годымак фотоаппаратше лийын да эре сниматлен улмаш. Икана колхоз председательын йодмыж почеш пасу паша кузе кайымым войзен да пырдыжгазетым луктын. “Школыштыда пырдыжгазетым ужым, чын корно дене каеда. Мыят йоча жапем шарналтышым,”, — мане фотограф.

Уна-влакан Екатерина Фомина шке возымо почеламутшым лудо. Тудо сайын тунемеш. Чыла мероприятийыште усталыкшым ончыкта.

“Кугарня” газетнан тӱҥ редакторжо Эдуард Иманаев вашлиймашым эртараш полшымылан, газет дене пеҥгыде кылым кучымылан туныктышо коллективлан да школым вуйлатыше Полина Владимировна Сорокиналан Таумутым кучыктыш.

“Ме куан шӱлыш дене авалтынна. Ик сай уверже: 2017 ийыште 60 тунемшым вераҥдаш ситыше у школым чоҥен шуктышаш улыт. Школыштак 25 йочалан йочасад лиеш. КызDSC_5639ыт документым ямдылыме паша кая. Школна тошто гынат, ила. Кажне тунемше куанен школыш коштеш, тӱрлӧ кружокышто шуаралтеш. Поснак Ольга Анатольевна Семенован вуйлатыме туризм дене кылдалтше кружокым жаплена. Республикыште районын чапшым аралена, эреак икымше вер дене палемдалтына. Школыштына кажне ийын “Келшымаш тулото” фестиваль эрта. Пошкудо Татарстан кундем Арск районысо ик школ дене кылна пеҥгыде. Нуно мемнам йоча Сабантуйыш ӱжыныт.

Тений марий йылме да литератур дене республикысе олимпиадыште Александра Оразаева икымше верым налын, регион-влак кокласе олимпиадыште тудо кокымшо вер дене палемдалтын. Школышто 13 туныктышо шинчымашым пуа, чылаже 42 йоча тунемеш, тений ныл тунемше выпускник, у тунемме ийыште вич йоча икымше классыш толеш”, — палдарыш Полина Владимировна. 

Сардаял Йошкар-Ола деч 180 меҥге тораште верланен. Тыште Марий радиом, Марий Эл радиом колыштын, марий телевиденийын передачыжым ончен огыт керт. Татарстан кундемын радиожо да телевиденийже гына толкыным куча. Садлан шукыж годым Сардаялыште чыла марий уверым газет гоч але Интернет полшымо дене пален налыт. Тыште редакцийын пашаеҥже-влак толмылан эреак куанат да кылым кучымылан таум каласат.

Татьяна Иванова.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: