"Улам мый Рве-зы-лык!" рубрик, 2016 ий, Пеледыш тылзын 17-ше кечыже

Профессийжым весылан огеш вашталте

Статьян авторжо Денис Очиев

садыгинПолицейский-влак нерген тӱрлын ойлат: икте нуным вурса, весе гын мокта, кугешна. Туге гынат формым чийыше-влак мемнам оролат да аралат. Садлан нунын радамыште службым эрташ самырык еҥ-влак пытартыш жапыште каяш тыршат. Шукерте огыл мыят тыгаяк рвезе дене палыме лийынам.

Виктор Садыгин республикысе вневедомственный охране управленийыштыже нылымше ий служитла. Рвезе Медведево посёлкышто шочын-кушкын. Ача-аваже Шернур район гыч улыт. Эше Викторын шочмыж деч ончычак нуно Медведевыш илаш кусненыт. Викторын аваже – кондитер, ачаже ончыч полицейский лийын, кызыт сулен налме канышыште. Рвезын Игорь шольыжат изаж семын вооружённый вийым ойырен: Санкт-Петербургысо военно-морской институтым пытарен, Зеленодольск олаште моряклан служитла.

Виктор Медведево посёлкысо 2-шо №-ан кыдалаш школым тунем лекмеке, Йошкар-Оласе аграрный колледжыш тунемаш пурен, техник-электрик специальностьым налын. Колледж деч вара рвезе армий радамыш логалын. Тула олаште верланыше Воздушно-десантый войскан частьыштыже служитлен. Военный службо келшен, сандене умбакыже Виктор тиде корнымак ойыраш шонен пыштен. Мӧҥгӧ пӧртылмекыже, иканаште манме гаяк МВД системыш пашаш пураш каен.

- Техник-электрик паша оҥай, тунемме годым уло кумылын занятийлаш коштынам. Колледжыште налме профессий дене пашам ышташ темлат гын, кызытсе профессием ом вашталте ыле. Тиде мыйынак, — ойла рвезе.

Спорт пашаште полша

Ик сутка пашам ышта, кок кече кана. Вневедомственный охране управлений пашаеҥ-влакын тӱҥ задачышт – объект-влакым оролаш. Пашаште нимыняр йокрок огыл. Олан тӱрлӧ районышкыжо кудалыштыт, тергат. Тений кеҥежым, мутлан, пырля пашам ыштыше сержант дене пырля шолышташ пурышым кучен. Ик пачерыште сигнализаций магыраш тӱҥалын. Рвезылан чоялыкым ончыкташ пернен. Шолышташ пурышым вашке кученыт. Тыгай пример-влак шуко вашлиялтыт. Садлан Виктор шке пашажын кӱлешлыкшым умыла.

Школышто рвезылан чыла пердмет келшен, но эн чот – физкультур. Кызытат спорт дене кылым куча. Яра жапыште йолташыже-влак дене тренажёр залыш коштеш. Куштылго атлетикым йӧрата. Куржталеш, турникыште шкенжым нӧлта, тыгак ече дене коштеш. Шке вийжым таҥасымашлаште эреак терга. Каныш кечым телевизор ончылно эртараш ок йӧрате, яндар южыш лектеш, жапым пайдалын кучылташ тырша.

- Мыланем пашам нимынярат нелын ок чуч. Мутат уке, чытыше, пеҥгыде койы-шоктышан лийман, тӱрлӧ неле ситуаций гыч лектын моштыман. Паша график дек тунем шуынам. Южгунам пайрем кечынат сменыш лекман. Чылан канат, а мый – пашаште. Ӱмаште У ий пайремланат пашам ышташ верештын. Но тений огеш логал, докан, — ойла Виктор.

У званиян

Ончыкылык нерген рвезе тыгерак каласыш: “Шке ешым чумыраш, икшыван лияш жап, шонем. Пашаштат ончыко у кӱкштышыш шуаш тыршыман”.

Шукерте огыл Викторлан у званийым пуэныт. Ынде тудо – кугурак сержант. У званий дене уло кумылын саламлена, тек службышто у званий дене у кӱкшытыш шуэш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: