"Сылнымут алан" рубрик, 2016 ий, Пеледыш тылзын 24-ше кечыже

Пудырго гыч погына пиалем

Статьян авторжо Татьяна Айтова

Пӧръеҥ йӧратымашым муо

Пӧръеҥ йӧратымашым муо –

Тудлан ок кӱл нимо тетла:

Огеш-кычал пелашым, уым,

Огеш кай – ешыштак ила.

Кычкаш лиеш торта коклашке,

Еш сапым ватыже куча:

Шупшкедылеш пурлаш, шолашке –

Марийже тидымак вуча.

«Таган йымал» — кочалге лӱмым

Тыгай пӧръеҥлан тушкалтат.

Эшеже тудын поро лӱмым

Лавран вӱд дене шӱалтат.

А тудо муын шӱм пелашым,

Ила, шке семын юарлен.

Огеш нал шотыш мыскылмашым,

Огеш кошт, пий семын ырлен.

Пала: йӧратымашым муын.

Пала: еш верч тыршаш возеш.

Кӱлеш гын, сералта у мурым

Кугу йӧратымаш лӱмеш.

Пала:  кугу йӧратымашым

Ок сеҥе даже кочымут,

Шӱмеш кода кеч сусыр кашым,

Да шӱм коржеш кеч кечыгут.

Коча ден йоча

Шым шукто лийын

аксакал-волгенче:

Шоҥгемше вачым пызыра ийгот.

Эсогыл тупыш возын жап  регенче –

Тора верлаш кошташ ом тошт.

Пыкшерак тошкыштам

сурт коклаште,

А южгунам ноен шинчам канаш.

Эсогыл кече ӧрынрак окнаште

Тӧча верем гыч модын кынелташ.

Ӱжеш уремыш, пошкудем коклашке,

Увер-аҥарым каҥашен налаш.

Коклан миен толаш Йошкар-Олашке

Поэт йолташ-влакемым вашлияш.

Пелашемат манеш

кокланже шыдын:

«Йӧршеш йоча гай

шоҥго койышет…»

Ийгот воштат ты койыш

витне, шытыш –

Йочаш шоҥгемме семын савырнет.

Кугезе-влак ала арам моктеныт:

Кочажын ӱмыржым шуя йоча.

Сандене уныкам

лач мыйын шинчам дене

Тӱням ончалын, илышым ненча.

Паша

«Паша деч посна илаш сае», -

Манеш йогырак пелторта.

Да шочмын пашашке ок кае,

Пашам каныш дене вашталта.

Вуча собес кидышке шумым,

Шона илаш пенсий кӱшеш.

Тыгай еҥым йӧршын ом умыло,

Чонемже пашашкак ӱжеш.

Толам, ончылтен чевер кечым,

Редакцийыш важнын пураш.

Тек ӧрын ончат тӱрлӧ вечын –

Вашкем мый планеркыш шуаш.

Планерко пуа кечыгутлан

Куатым, у темым шымлаш.

Муаш верым серыпле мутлан

Да тудым чон воштак колташ.

Тыге лийын ончыч…

А кызыт

Чонем паша верчын коржеш.

Улам пуйто ончычсо йыгыт –

Йолем кучаш ок лий: куржеш.

Ноен кечыгут, мый ом шуло,

Пашаште муам пиалем.

Пашаште гына илыш уло –

Пашаште гына мый илем.

Редакций олмеш олмавечыш

Мый кызыт эрдене вашкем:

Саска  лектышан пиал верчын

Коштам «келшымаш» садышкем.

Бриллиант

Лупс пакчаште таче чотак возо:

Йырым-йыр чӱкталте бриллиант.

Шич да почеламутым возо,

Я ик чинчым кучыкто тылат.

Мый палем: тылат ок келше тудо,

Кечыйол ден модшо вӱд шырча.

Шылже пылыш кечыйолын тулжо –

Йомдара моторлыкым пакча.

Бриллиант, конешне, лийже чынак

Чот йӧратымашлан кугу ак:

Куаналже ыле тыйын чонак,

Лекше ыле келшыше шомак.

Кычалаш тыгай шомакым неле,

Но ӱшане, мый муде ом код.

Муамат – ойлем лач тылат веле,

Мут оргажым кышкылтын ом мод.

Кызытеш чӱчкалже шийын-тойын

Лупсын бриллиантше йырымваш.

Йӧратем мый лачак иктым тыйым:

Чын бриллиант гай ты йӧратымаш.

Кучыктем бриллиантовый шергашым,

Вуйышкет вӱргенчыкым пыштем.

Тӱҥалам вучаш

мый ӱдыр ден эргашым –

Тыйым пиалан авам ыштем.

Пӱсӧ йылме

Лӱмем лапкаҥдаш, йолташем

шонен огыл –

Ышташ тӧчыш

пуйто шижде мыскарам.

Эсогыл ватем шотшо дене

колтыш вожыл,

Кок кече шкежат

ӧрын коштам арам.

Тыгай мыскарам

ок кӱл шотышко налме:

Йылмем пуйто

мыйын пӱчкеш кӱзыла.

Тыгайжым шкежат

йӧршынат омак пале –

Могай еҥ деч тидым

йылмем кӱсынла?

Ачам огеш мошто

вурседылын йӧршын,

Авам шыргыжеш

лачак порын гына.

Кочам, веселан чӱктен чока ӧршым,

Чарен «чывысарым»

пеш шуко гана.

Таклан мо ойлатыс

шкенан Купсолаште:

«Онис кашак улыт

пеш поро чонан…»

Тидлан ӱшанаш йӧсырак иканаште –

Ила кажнын шӱмыштӧ

сӱмсыр чыган.

Лектеш йорга койыш,

пайрем годым шолын,

Лектеш да монда шыпак

шылын шинчаш.

Пӱрга южгунам

пошкудо вак шоҥым,

Чӱкта ужар тулым

чолган шем шинчаш.

Конешне, коклаштышт

сар тулжак ок ылыж –

Сырат да чаракым

подылмек сӧрасат:

Ок лий пеленет пошкудет –

коржеш шылыж

Да шкетын илаш

огеш лий низаштат.

Монда пошкудет

тыйын суртышко корным –

Тунам шоналтет:

«Кушко йомыч, йолташ?»

Ыштен илыш корнышто

кажнылан порым,

Могай пиал ончыко ошкыл колташ.

Кок кече

Рульым чоткыдын кучен,

Ӱдыр кудалеш.

Шкеже кече гай чечен:

Кечылак гына коеш.

Шыргыжалын ӱдырлан,

Йыштак шоген кодым.

Корныжат дыр мӱндырак?

Ялыш шуэш водын.

Вашлиеш ола унам

Кече гае каче.

Таҥжым кумылын шуна

Пайрем сий дене таче.

Тарвата марий сӱаным –

Ӱдыржат туштак келша.

Илышым ӱян-мӱяным

Кычалаш тудлан полша.

Муыныт шке еш пиалым –

Пиалжат тыштак улмаш.

Ӱдыр толмыж дене ялыш

Чын ыштен – нимом ойлаш.

Каважат яндар да канде…

Ой! Моткоч ласка шӱлаш.

Моркышто тыгодсек ынде

Кок кече йолген ила.

Эврик Анисимов.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: