"Улам мый Рве-зы-лык!" рубрик, 2016 ий, Пеледыш тылзын 24-ше кечыже

Студентке, фотограф, вуйлатыше

Статьян авторжо Анастасия Эманова

Марий самырык тукым коклаште чолга ӱдыр-рвезе-влак ятыр. Нуно тӱрлӧ ушемыш коштыт, слетлаште, фестивальлаште марий улмыштым ончыктат да шке пашашт дене кызытсе саманыште марий шӱлышым арален кодаш тыршат. Елена Рублева – МарГУ-н студенткыже, тудо тыгак “ВийАР” тӱвыра да келшымаш кыл шотышто мер ушемыште пресс-службым вуйлата.

Чолга ӱдыр Лена РублеваЛена Параньга район Олор ялыште шочын. Тысе кыдалаш школым тунем пытарен. Сай да уста тунемше лийын. “Изинек поэзийлан кумылан кушкынам. Руш поэт Эдуард Асадовын почеламутшо-влакым лудаш поснак чот йӧратем. Мурпашаже-влакым куштылго йылме дене возымо, нуно оҥай, илаш туныктышо улыт. Шкеже сокыр лийын гынат, шуко чапле произведенийым возен. Школышто тунеммем годым тӱрлӧ сылнымут конкурсышто чӱчкыдын участвоватленам. Кок гана Колумб лудмаште мастарлыкем ончыктенам, кок ганажат кокымшо верым налынам”, — ойла Лена. Л.Рублева марий йылмым да литературым туныктышо лияш тӱҥалтыш класслаштак кумылаҥын. “Шочмо йылмем моткоч йӧратем, тиде туныктышо лияш амал лийын. Школ деч вара МарГУ-со Калык культур да тӱвыра кокласе кыл институтыш тунемаш пуренам. Ынде кумшо курсыш кусненам. Кызыт шуко школышто марий йылме ден литератур уроклам туныктымо шагатым шагалемдыме, тидлан кӧра ончыкшым школышто туныкташ тӱҥалам але укем раш ойлен ом керт, илыш ончыкта. Студент илышем пайдалын эртараш тыршем. Тӱрлӧ конференцийыште чӱчкыдын участвоватлем. Ӱмаште марий самырык тукым слетышто лийынам. Тыште шукылан тунемынам, йолташ-влакым муынам. Тыгай вашлиймаш марий ӱдыр-рвезе-влак коклаште икоян улмынам пеҥгыдемда. Мый “ВийАр” ушемыште улам, пресс-службо пӧлкам вуйлатем. Тушто шуктымо пашам куаным конда. Ушемна пытартыш жапыште виянрак лийын, у шӱлышым налын, манаш лиеш. Ме тыршен пашам ыштена. 9-11 июльышто Морко районысо Унчо этнокультур комплекс пелен “Унчоfest” лагерь-семинарым эртарена. Тушко журналист, видеограф, кином ончаш йӧратыше-влакым ӱжына. Лагерьыш Эстоний гычат участник-влак толшаш улыт. Тений тыгак Кино идалыклан пӧлеклалтше ятыр мероприятийым эртараш палемденна. Тылеч посна мый “Кидшер” интернет-журналыште фотографлан тыршем. Лишыл жапыште сайт пелен у фото проектым ыштынем”, — ойла ӱдыр. Л.Рублева марий улмыж дене кугешна. Марий калыкшылан пайдам кондынеже, но эн ончыч ача-аваже кугешныже манын тырша.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: