"Кузе илет, ялем?" рубрик, 2016 ий, Пеледыш тылзын 24-ше кечыже

У Эшым да Лепышкан яллаште – Семык

Статьян авторжо Татьяна Айтова

Семык – марий калыкын эн жаплыме да йӧратыме пайремже. Семык толмо дене кеҥежын ямже шижалтеш. Ты кечын Чорай кундемыште илыше марий-влак Сорта кечылан ямдылалтыт, мончаш олтат, тоштыеҥ-влакым уштат. Теве 19 июньышто Пошкырт кундем Мишкан район У Эшым да Лепышкан ял-влак коклаште верланыше Акарт курыкышто тошто йӱлам шарналтеныт.

Ты кечым ондак кузе пайремлыме нерген тиде ялыште илыше Татьяна Иликбаева  тыге каласкала:

«Семыкым пайремлыме йӱла ялыште кушеч лектын, омат шарне. Ял шочмек, иктаж колымшо ийлаште гын веле. Шарнем: кугече изарнян, Сорта кече деч вара, пошкудо ял калык У Эшымышке погынен, тӱшка-тӱшка дене толын кум кече гармонь йӱк чарнен огыл. Тӱҥалтыште клубышто, варажым Акарт курыкышто мурен-куштен. Пурак нӧлталалтын гын, клуб тӧрзам кораҥден, кӱвар ӱмбак вӱдым опталын, умбакыже куштеныт. Южыжо уремыште, весышт Акарт лапыште мурен-куштеныт. Шуматкечын Акарт курык вуй мӱкшла ызген».

Кызыт пайрем изиш вес сыным налын. Кажне ял гыч гармоньчо-влак толыныт, шке масталыкыштым ончыктеныт, а погынышо еҥ-влак нунын шоктымышт почеш мурен-куштен. Калыкым ты пашалан Владимир Хамитов кумылаҥден.

«Мый У Эшым ялыште шочын-кушкынам, садланак дыр тошто марий пайремым ял дене угыч пайремлаш шонымаш вуйыш толын пурен, — ойла Владимир Хамитов. — Шкеже гармоньчо улам да садланак пайремым эше «Играй, гармонь» манын лӱмдышна. Район администраций дене кутырен келшымек, пашалан пижме. Калык окса дене полшен. Еҥ-влаклан кугу таум каласена. Моткоч шукын погыненна ыле. Теве йолташемым индеш ий ужын омыл,  а тудо тышке ты пайремыш лӱмын толын!  Кажныже шке палымыжым, тошто йолташыжым да родыжым вашлийын докан».

 

Игорь Кутлуметов.

Авторын фотожо.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: