"Рубрик деч посна", 2016 ий, Пеледыш тылзын 12-шо кечыже

«Чылалан тыныс лийже»

Статьян авторжо редактор

IMG_1804
Тыге марла каласен калыкым благословитлымыж годым Йошкар-Олаште Патриарх Кирилл
12 июньышто Йошкар-Олаште Москон да Уло Русьын Патриархше Кирилл уна лийын, рӱдолаште чоҥалт шуктышо Благовещенский кафедральный соборым освятитлен, туштак литургийым эртарен. Службо жапыште молитвам марий йылме денат лудыныт. Патриарх шкежат марла «Чылалан тыныс лийже» манын калыкым благословитлен.
IMG_1728
Службо деч вара Йошкар-Олан да Марий архиепископ Иоанн, Марий Эл Республикым вуйлатыше Л.Маркелов Москон да Уло Русьын Патриархше Кириллан Марий мландыш толмыжлан тауштен ойленыт да пӧлекым кучыктеныт. Моско гыч толшо кугу уна эн ончыч республикыште черке йӱла вияҥмым палемден да шке жапыштыже калыкын илышыжым «шемемдаш» шонышо-влакын моторлыкым шалатен, бетон ораш савыраш тӧчышӧ-шамычын кӱлдымӧ пашаштым ушештарен. «Илышыште асфальт, бетон лончо гочат ужар кушкыл шытен лектеш, тудлан чаракым ышташ огыл гын, одарланен шогалеш. Черке пашамат тыгак: кӱлдымашлан шотлен, бетоныш савыраш огеш лий. Тидым тендан республикыште кызыт шуктымо паша пеҥгыдемда. Таче Марий кундемыште черке-влак уэш чоҥалтыт, тиде куандара», — каласен Патриарх Кирилл. Тыгай кӱлешан да сай пашам шуктымаште тудо Йошкар-Олан да Марий архиепископ Иоаннын да Марий Эл Республик вуйлатыше Леонид Маркеловын надырыштым палемден, нунылан пӧлекым ыштен. Тыгак пашаштым аклен, Москон да Уло Русьын Патриархше Марий Эл правительстве вуйлатыше Л.Маркеловым, тудын икымше алмаштышыже Н.Куклиным да икмыняр моло еҥым посна награде дене палемден. А Благовещенский кафедральный соборлан пӧлек шотеш Иисус Христосын образшым коден.
Черке гыч лекмек, Патриарх Православный рӱдерыште лийын, республик вуйлатыше Л.Маркелов дене вашлийын, 15 шагатлан Изи Какшан сер воктене 12 апостол-влак лекман шагатым ончен да Российын рӱдолашкыже чоҥештен.
Тылеч ончыч Марий Элыш Москон да Уло Русьын Патриархше Алексий II 1993 ийыште толын каен. Тунам Марий епархий ышталтын.
Пайрем службышто лийше-влак тиде кечын икмыняр ӧрыктарыше сӱретым ужынна манын ушештарат. “Святейший Патриархын толын коштмо пайремым Кугече денат таҥастараш лиеш. Чонышто тыгай куан! А паледа ыле гын, службо жапыште ме, уремыште шогышо-влак, кече йыр волгалтше шонанпылым ужынна. Тугеже тидат кугу пайремым ушештара, кечат Кугече годсо гай модын”, — маньыч Йошкар-Олашке Волжск кундем гыч толшо-влак.
Чынжымак, игече пеш мотор лийын, ончыч кече шыратен ончен. А службо деч вара, калык шаланен пытымеке, мардеж лыжга йӱрым шыжыктен модын.
Э.Иманаев.
Авторын фотожо.
IMG_1730
IMG_1822

IMG_1837

IMG_1847

IMG_1807
IMG_1850

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: