"Рубрик деч посна", 2016 ий, Пеледыш тылзын 7-ше кечыже

Шайра курыкыш куржынат, нушкынат, камвозынат кӱзеныт

Статьян авторжо Светлана Кушакова

5 июльышто Волжский районысо Руш Шайра да Мӱшылъер воктене курыкыш куржталше-влак коклаште Волжский районын III-шо первенствыже эртен. Тыгак стартышке курык коклаште куржталмаш дене Россий Гран-прин VI этапшын участникше-влак, ветеран-влак коклаште Россий кубокым сеҥен налаш шонышо-влак шогалыныт. Тиде кугу спорт пайрем самырык-влаклан кажне арнян лектын шогышо “Кугарня” газетлан 25 ий теммылан пӧлеклалтын.

Пайремыш куржталаш йӧратыше, таза илыш-йӱлам кучышо да спортын ты видшым шукырак еҥ авалтыже манын тыршыше 200 утла еҥ, уна-влак республикынан Волжский, Курыкмарий, Килемар, Звенигово, Морко районлаже, Йошкар-Ола, Омск, Волгореченск, Кострома, Шуя, Иваново, Озаҥ, Моско, Владивосток олала гыч толыныт. Нуным район администрацийым вуйлатышын социальный йодыш шотышто алмаштышыже Е.Овчинникова, Сотнур села администрацийым вуйлатыше С.Антонов, курыкыш куржталмаш дене Россий комитетын членже А.Замков, куштылго атлетике дене Йошкар-Оласе федерацийым вуйлатыше В.Воронцов саламленыт. Куштылго стартым да сеҥымашым “Кугарня” газетын тӱҥ редакторжо Э.Иманаев тыланен.

Куржталмаш икмыняр этап дене эртен. Эн ончыч стартыш 2005 ийыште шочшо-влак да самырыкрак ӱдыр-рвезе, шке вийым тергаш шонышо ӱдырамаш ден пӧръеҥ-влак, начар тазалыкан еҥ-влак шогалыныт. Нуно ик меҥгым куржыныт. Тыштак “Кугарня” газет редакцийын пашаеҥже-влак таҥасеныт. Молышт ийгот дене келшышын кок, ныл, куд, латкок меҥгым куржыныт.

Игече пылан, изиш йӱран лийын гынат, тидыже кумылым волтен огыл. Южыжо икымше гана тыгай таҥасымашке ушнымыжлан да финиш марте куржын шумыжлан, весышт чылам ончылтен кертмылан куаненыт. Курыкыш куржын кӱзаш изижге-кугужге кумылан лийыныт. Куржынат, нушкынат кӱзеныт, йӱр деч вара камвозын куржшат ешаралтыныт. Финиш марте чылан толын шуыныт. Самырык-влак коклаште эн тале спортсмен-шамычлан “Кугарня” газет лӱм дене кубокым Волжский район Пӧтъял гыч Анна Петрова ден Йошкар-Ола гыч Денис Головинлан кучыктымо. Чыла куржталшым свидетельстве дене палемдыме.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: