"Ой, йӧратымаш..." рубрик, 2016 ий, Сӱрем тылзын 1-ше кечыже

Еш туманлымаш

Статьян авторжо Татьяна Айтова

Пытартыш жапыште пелашем дене чӱчкыдын вурседылына. Еш ласкалыкым аралаш мом ыштыман?

Наталья.

Медведево район.

Республикысе «Доверие» психологий да педагогике рӱдерын педагог-психологшо С.Г.Левенштейн вашешта:

- Ешыште эре чыла сай гына огеш лий, южгунам умылыдымашат, вурседылмашат лектын кертыт. Кажне айдемын шке койыш-шоктышыжо, шонымашыже уло, садлан эн ондак икте-весым умылаш да аклаш тунемман.

Шукыж годым вурседылмаш йºршеш амал деч посна шочеш. Утыжым ида кычалтыл, порырак, тыматлырак лийза. Пелаш дене лыжган мутланыза, кажне кечын иктаж сай пашалан мокталташ ида мондо.

Вурседылме годым кеч-кунамат кок еҥ титакан. Йоҥылыш улмым шижмек, нелеш ит нал манын йодаш вожылман огыл. Шыдым кºргыштº нигунам кучен ида кошт, тыге весыланат, шканат удам гына ыштеда. Иктаж умылыдымаш лектын гын, тудым вигак ласкан каҥашен налза.

Йӱшº, ярныше але шужышо пелаш дене нигунамат ида вурседыл, ида кычалтыл. Тыгай годым айдеме утларак ажгына веле, мутланаш кумылжо огеш лий.

Еш коклаш родо-тукымым але иктаж вес еҥым нигунамат ида пурто. Шке уш-акыллан, чон шижмашлан эҥертыза.

Єпкем ида кучо. Ончыч лийшым уэш-пачаш шарнымаш сайыш огеш шукто.

Чоным сусыртышо кочо шомаклан уда дене ида вашеште. Уке гын шургымаш талышна веле. Вес пºлемыш лекса, 10-15 минут вучалтыза, ласкан шӱлалтыза. Жап эртымеке, молан тыге лиймым каҥашен налза.

Кажне еш шке семынже пиалан. Икте-весым умылен илаш кеч-кунамат куштылго огыл. Тидлан кок пелашланат чот тыршаш кӱлеш. Ласкан илынеда гын, ида вурседыл, а порын мутланаш, кушто йоҥылыш лиймыдам кычалаш, проститлаш тунемза.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: