"Кугарнягудо" рубрик, 2016 ий, Сӱрем тылзын 29-ше кечыже

Йӧратыме паша чоным куандара

Статьян авторжо Марина Богданова

Елена Смородинова

Марий Турек кундемын ӱдыржӧ Елена Смородинова С.Чавайн лӱмеш Национальный библиотекыште 10 ий пашам ышта. Книгагудо тудлан шочмо суртшо гай лишыл, кажне эрдене тушко куанен ошкылеш.

Паша корныжо тыштак тӱҥалын. Студент пагытше годымак библиотекарьлан ыштен. Икымше кечым тачат порын шарналта, библиотекарьын пашажым акла. Тудо книга палате пӧлкам ынде шым ий вуйлата. Самырык специалист пӱсӧ уш-акылан, виян, кеч-могай чаракым лӱдде эрта. Чыла пашам шот дене ышташ тырша.

Елена йоча жапше годсек пашалан ура чонан кушкын, ача-авалан эре полшен шоген. Ачаже — строитель, аваже – бухгалтер. Марий Турек поселкышто йоча пагытше эртен. Школ годсек лудаш да сочиненийым возаш йӧратен. Сандене журналист лияш шонен. Но ешыште нелылык лекмылан кӧра тиде шонымаш деч кораҥын.

2004 ийыште Марий кугыжаныш университетысе тӱвыра да сымыктыш факультетышке (кызыт Калыкле тӱвыра да тӱвыра кокласе кыл институт) информационный ресурс менеджер специальностьлан тунемаш пурен.

«Профессийым ойырен налме годым йоҥылыш лийын омыл манын шонем. Чавайн лӱмеш книгагудышто практикым эртенам. 3-шо курсышто пел ставке дене библиотекарьлан пашам ышташ тушко пурышым. Краеведений — шкешотан, моло деч ойыртемалтше пӧлка. Тушко шуко студент, ученый коштыт. Нунылан тӱрлӧ книгам, журналым кычал пуэна. Тунамак пашам ышташ тушто келшен», — каласкала Елена.

Кок ий библиотекарьлан ыштымеке, обработко отделышке библиографлан кусареныт. Шуко марий книга тудын кидше гоч эртен, кажне книган данныйжым возен налын, электрон форматышке пуртен.

2009 ийыште Марий кугыжаныш университетым тунемын пытарен. Пашаште чолгалыкым, тыршымашым ончыктен, садлан Чавайн лӱмеш книгагудышко книга палате пӧлкам вуйлаташ ӱжыныт.

«Коллективыште сай пашаеҥ-влак пашам ыштат. Чыланат марий улыт. Нунын дене вашке ик умылымашыш шуынам, ме чыланат пырля вашла полшен ыштена. Отделыште Марий Эл Республикыште савыкталт лекше книга, журнал, газет-влакым поген, ме книгагудын архивыштыже кум экземпляр дене аралена. Кажне издатель книгагудышко газетым, журналым конден пуа але почто дене колта. Тиддеч посна шым тӱрлӧ летописьым чумырена. «Эн сай книга» конкурслан отделна вуйын шога. Тудым кок ийлан ик гана, октябрь гыч декабрь марте, эртарена. Тушко книга издатель, книгам сӧрастарыше сӱретче, полиграфист, автор-влак ушнен кертыт. Конкурсын условийже почеш, кум экземплярым книгагудылан, иктым конкурслан пуыман. Тыге ме шкенан фондым пойдарена. Кажне конкурс шкешотан», — каласкала Елена.

2012 ийыште книга конкурсым эртарымаште надырым пыштымылан Елена да отделыште пырля пашам ыштыше Аида Пчелкина Олык Ипай лӱмеш премийын лауреатше лийыныт. Мутат уке, тиде кугу сеҥымашыш шумым ончыкта да эше утыр пашам ышташ вийым пуа.

Елена – опытан специалист, лу ий жапыште шукылан тунемын шуын. Тудо поро ава, сай озавате. 2012 ийыште Шернур поселкышко марлан лектын. Кум ияш Даша ӱдырышт уло.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: