"Рубрик деч посна", 2016 ий, Сӱрем тылзын 1-ше кечыже

Кикимор Профи — 2016

Статьян авторжо Денис Очиев

кикиморЛавыра деч лӱдде, моткоч чот ноен, финиш марте чыланат куржын толыныт. Тыгай шӱлышан мероприятий 25 июньышто Йошкар-Олаште эртен. Тудын лӱмжӧ — экстремал кросс “Кикимор Профи – 2016”.

Ты таҥасымашым эртарымаш кундемыштына йӱлаш пурен. Икмыняр ий ондак тӱрлӧ амаллан кӧра тудо лийын огыл. Туге гынат энтузиаст-влак пӧртылтен кертыныт. Йошкар-Ола гыч Иван Рыбаков экстремал спортым йӧрата. “Кикимор Профиште” ик гана веле огыл участвоватлен, садлан уэш ты пашалан пижын. Спонсор-влакат лектыныт.

25 июньышто 9 гыч 10 шагат марте регистраций лийын. Правил почеш, кроссышто участвоватлыше, тӱҥжӧ, ийын моштышаш улмаш. Чылаже 3 еҥан 11 команде шке вийжым терген. Пӧръеҥ-влак 2,1 километран кок йырым куржыныт, ӱдыр-влак – ик йырым. Дистанцийыште купышто да вӱдышто гоч куржман, ошмаштат кайыман ыле. Старт 11 шагатлан пуалтын гын, пытартыш участник иктаж 45 минут гыч гына финишым эртен толын.

- Чылажат чапле ыле! Участник-влак шагалын лийыныт – тиде ӧрыктарен. Ончычсо гай огыл. Увертарымаш шагал лийын. Туге гынат организатор-влак молодец улыт, тыгай таҥасымашым эртарен кертыныт, — ойла участник Николай Шедогубов.

Шкет первенствыште В.Олешкин сеҥен; тӱшка первенствыште – С.Лебедев, И.Рыбаков да С.Рыбаковын командыже; абсолютный шкет первенствыште пӧръёҥ-влак коклаште Д.Головин, а ӱдыр-влак коклаште — К.Мубаракшина сеҥышыш лектыныт.

Кумылан-влак лавыран кросс деч вара куснылшо мончаште мушкылтыныт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: